ДХХ Тошкент, Наманган ва Фарғона вилоятларида ноқонуний ер сотиш ҳолатларининг олдини олди. Бу ҳақда «Дарё»га ДХХ матбуот хизмати хабар берди.

Фото: Видеодан кадр

Маълум қилинишича, 2018 йил Тошкент вилояти Бўстонлиқ тумани ҳокимининг қарорига мувофиқ от спортига ихтисослашган МЧЖга меҳмонхона, коттежлар, отхона, ветеринария блоки, манеж, очиқ ва ёпиқ турдаги плац қуриш учун 25,4 гектар ер майдони ажратилган. Лекин мазкур жамият таъсисчиси амалда ҳеч қандай иш бажармасдан, ўзининг маклер таниши билан келишган ҳолда ушбу ер майдонини бошқа бир фуқарога 1,5 миллион долларга сотмоқчи бўлган.

ДХХнинг Тошкент вилояти бўйича бошқармаси, вилоят прокуратураси ва Департамент ходимлари томонидан ўтказилган тезкор тадбирда улар сўралган пулдан аванс сифатида 700 минг доллар олган вақида ушланган.

Тошкент вилоятининг Зангиота ва Тошкент туманларида истиқомат қилувчи 3 нафар шахс ўзганинг номида бўлган МЧЖга 2019 йил Зангиота тумани ҳокими қарори билан юқори технологик иссиқхона қуриш учун ажратилган 2 гектар ер майдонининг 1,5 гектарини бошқа бир фуқарога расмийлаштириб, эгалик ҳуқуқини олиб бериш эвазига ундан 150 минг доллар талаб қилган. Улар олдиндан 60 минг доллар олган вақтида ДХХ ва Департаментнинг Тошкент шаҳар бўйича бошқармалари ходимлари томонидан ушланган.

Тошкент вилояти Зангиота туманида яшовчи, муқаддам судланган шахс 2018 йил деҳқончилик билан шуғулланмоқчи бўлган фуқарога мазкур туман ҳокимининг қарори асосида ажратилган 35 сотих ер майдонини бошқа бир фуқарога 80 сотих дея алдаб, унга ҳокимият ва кадастр идораларида юқори лавозимларда ишловчи танишлари орқали эгалик ҳуқуқини олиб беришини ваъда қилади ва эвазига 160 минг доллар сўраган. У сўралган пулдан 30 минг долларни аванс сифатида олган вақтида ушланган.

ДХХнинг Тошкент вилояти бўйича бошқармаси, вилоят прокуратураси ҳамда Департамент ходимлари томонидан ўтказилган тезкор тадбирда маклерлик билан шуғулланувчи икки нафар шахснинг ноқонуний ҳаракатларига ҳам чек қўйилган.

Хусусан, ушбу фуқаролар маҳаллий тадбиркорга Бўстонлиқ тумани «Ғазалкент» ҚФЙ ҳудудидан ўтувчи Чирчиқ дарёси бўйидан тумандаги МЧЖлардан бирига қайиқлар тўхташ жойи ва ташриф буюрувчиларга дам олиш жойи яратиш учун ажратилган 1 гектар ер сотилаётганини айтиб, 260 минг доллар эвазига мансабдор танишлари орқали ушбу ер майдонини унинг номига расмийлаштириб беришини билдирган. Улар сўралган пулдан 20 минг долларни аванс сифатида олган вақтларида ашёвий далиллар билан ушланган.

Бир вақтнинг ўзида Наманган вилояти Косонсой туманидаги пахта ва ғалла етиштиришга ихтисослашган кластер бош агрономи ҳамда пахтачилик билан шуғулланувчи фермер хўжалигининг иш бошқарувчиси вазифаларида фаолият юритувчи шахс ўзганинг ишончига кириб, унга иссиқхона ва дала дўкони қуриши учун мазкур фермер хўжалиги ер майдонидан 2,1 гектарни мансабдор танишлари орқали унинг номига расмийлаштириб бериш эвазига 55 минг доллар талаб қилган.

ДХХнинг Наманган вилояти бўйича бошқармаси ходимларининг вилоят прокуратураси ҳамда Департаментнинг ҳудудий бошқармаси вакиллари билан ҳамкорликда ўтказган тезкор тадбирида у 45 минг доллар ва 106 миллион сўм пул маблағини олган вақтида ашёвий далиллар билан ушланган.

Фарғона вилояти Қува тумани ҳокимлигининг икки нафар собиқ ходими андижонлик икки фуқарога тадбиркорлик билан шуғулланишлари учун юқори лавозимда ишловчи танишлари орқали туман ҳудудида жойлашган эркин иқтисодий зонадан 6 гектар ер ажратиб бериш эвазига улардан 28 минг доллар талаб қилган. ДХХ ва Иқтисодий жиноятларга қарши курашиш департаменти ходимлари томонидан ўтказилган тезкор тадбирда ушбу фуқаролар 23 минг доллар олган вақтларида ушланган. Шунингдек, улар сўралган пулдан 5 минг долларини муқаддам олгани ҳам маълум бўлган.

Терговга қадар текширув ҳаракатлари давомида эса ушбу шахслар ўзларининг ноқонуний ишларига Қува тумани ҳокимлигининг инвестиция ва ташқи савдо бўлими ходимини ҳамда 1977 йилда туғилган маҳаллий фуқарони ҳам жалб этгани аниқланган.

Қайд этилишича, ҳозирда мазкур шахсларга нисбатан Жиноят кодексининг тегишли моддалари билан жиноят ишлари қўзғатилиб, тергов ҳаракатлари олиб борилмоқда.

Бундан аввал Ўзбекистонда энди ноқонуний қурилиш ва ерни ўзбошимчалик билан эгаллаш тўғрисида Telegram-бот орқали хабар бериш мумкинлиги, Бўстонлиқдаги «Бочка» дам олиш маскани ҳудудидан фуқарога 450 минг долларга ер сотмоқчи бўлган шахс ушлангани, Жиззах ва Бухорода ерларни ноқонуний равишда сотиш ҳолатлари аниқлангани ҳақида хабар берилганди.