«Бир порталчи фуқароча обрўмиз йўқ». Қашқадарёлик депутат ташкилот раҳбарларининг депутатлар сўровига жавоб бериши қониқарсиз эканини айтди

Қашқадарё вилоятининг Деҳқонобод туманидан сайланган депутат Бекзод Бердиев Халқ депутатлари туман кенгашининг навбатдаги сессиясида туманда депутатлар сўровига жавоб бериш масаласи ачинарли аҳволда эканини маълум қилди. Бу ҳақда «Дарё» мухбири хабар берди.

«Туманда бир порталчи фуқароча обрў-эътиборимиз йўқ. Ташкилот ва корхона раҳбарларининг сўровимизга жавоб бериш масаласи жудаям ачинарли аҳволда. Деярли жавоб берилмайди, десак ҳам бўлади. Лекин депутатлик сўровимизга жавоб бермаган ўша ташкилот раҳбари шикоятчи фуқарога тезда жавоб хати қайтаради. Бу нима дегани, бу биз депутатларнинг ўша порталчи фуқароча обрўмиз, таъсиримиз йўқ дегани», — дейди депутат Бекзод Бердиев.

Депутат ташкилот ва корхона раҳбарларининг депутатлик сўровига жавоб бериш масаласини сессияда кўриб чиқишни таклиф қилди.

«Туманда ташкилот ва корхона раҳбарларининг депутатлик сўровига жавоб беришига бағишлаб, алоҳида сессия чақиришни таклиф қиламан. Депутат сўровига жавоб бермаган ёки жавоб беришни пайсалга солиб келаётган ташкилот раҳбарларининг ишда қолиш-қолмаслик масаласини ҳам муҳокама қилишимиз керак. Ана шундагина депутат сўровига нисбатан эътиборлироқ бўлишармиди?» — деди туман кенгаши депутати Бекзод Бердиев.

Халқ депутатлари туман кенгаши котибияти мудири Камолиддин Хушвақтов депутат ташаббусини қўллаб-қувватлаб, навбатдаги сессияда ташкилот ва корхона раҳбарлари иштироки ҳам таъминланиб, раҳбарларнинг депутатлар сўровига жавоб бериш масаласи муҳокама қилинишини маълум қилди.