Тошкент шаҳрида коронавирус инфекцияси тарқалиши билан боғлиқ вазият сўнгги икки ойда яхшиланган, хусусан, 1 июль куни пойтахтда сўнгги бир ой ичидаги энг паст касалланиш кўрсаткичи (99 киши) қайд этилди. Буни Соғлиқни сақлаш вазирлиги томонидан юритилаётган Ўзбекистонда коронавируснинг тарқалишига доир расмий статистик маълумотлар кўрсатмоқда.
Доимий ўчоқлар
Расмий статистикага кўра, Тошкент шаҳрида апрель ойида 5072 та касалланиш ҳолати рўйхатга олинган (30 апрелнинг ўзида пойтахтда 259 кишида касаллик тасдиқланган — таққослаш учун, 9 июнь куни бутун Ўзбекистон бўйича 243 кишида коронавирус аниқланган). Май ойида Тошкентдаги касалланиш кўрсаткичи 4660 ни ташкил этган (апрелга нисбатан 412 тага кам).
Июнь ойида эса Тошкент шаҳрида касалланиш кўрсаткичи май ойидагидан ҳам пастроқ бўлган — қайд этилган 3968 та ҳолат майдаги кўрсаткичдан 692 тага, апрелдаги «натижа»дан эса 1104 тага (ёки салкам 23 фоизга) кам. Тошкент вилоятида ҳам қарийб шундай ҳолат — ҳудудда июндаги касалланишлар сони майдагига нисбатан 16,7 фоизга камайган.
Шу боис Самарқанд вилояти биринчи марта касалланишлар сони бўйича Тошкент вилоятини ортда қолдириб, иккинчи ўринга кўтарилди (биринчи ўринда пандемия бошидан бери Тошкент шаҳри туради) — вилоятда июнда 1328 ҳолатда коронавирус тасдиқланган. Бу майдаги «натижа»дан 70 тага кам, бироқ ўсиш суръати Тошкент вилояти билан таққослаганда барибир юқори.
Янги ўчоқлар
ССВнинг 1 июль ва 2 июль якунлари бўйича берган ҳисоботларига кўра, Қорақалпоғистон Республикаси (1 июль — 47 та), Андижон (2 июль — 38 та), Бухоро (2 июль — 45 та), Навоий (2 июль — 8 та) ва Сирдарё (2 июль — 23 та) вилоятларида коронавирус инфекциясини юқтириб олиш бўйича 2021 йил ҳисобидан мутлақ антирекордлар қайд этилган. Июннинг иккинчи ярмида Жиззах (30 июнь — 41 та), Наманган (30 июнь — 43 та), Самарқанд (25 июнь — 90 та), Сурхондарё (19 июнь — 74 та), Фарғона (29 июнь — 60 та), Хоразм (26 июнь — 49 та), Тошкент (25 июнь — 94 та) вилоятларида йил антирекордлари ўрнатилган эди. Айнан шу антирекордлар сабаб 2021 йилда биринчи марта Ўзбекистонда коронавирусга чалинганлар сони бир ойда 10 минг кишидан ошди.
Июнь ойи якунлари бўйича хулоса қилинса, энг оғир вазият Сурхондарё вилоятида юзага келганини кўриш мумкин — вилоятда май ойида бор-йўғи 65 та ҳолатда коронавирус қайд этилган бўлса, июнь ойида 837 та — май ойига нисбатан 772 тага ёки 1187 фоизга ёки салкам 13 баробарга кўп — касалланиш ҳолати рўйхатга олинган. Таққослаш учун, 2021 йилнинг дастлабки беш ойида Сурхондарё вилоятида жами 230 та (биргина июндаги кўрсаткичдан 3,6 баробарга кам) ҳолатда COVID-19 аниқланган эди. «Дарё» манбалари, вилоятдаги муштарийлар берган маълумотларга кўра, Сурхондарёда оилавий касалланиш ҳолатлари кўпайган, вафот этган беморлар ҳам оз эмас.
Сурхондарёдан ташқари Жиззах вилоятида (майда — 156, июнда — 518) касалланиш ҳолатлари 3 мартадан кўпроққа, Бухоро (майда — 129, июнда — 357) ва Қашқадарё (майда — 134, июнда — 342) вилоятларида қарийб 3 мартага, Наманган (майда — 154, июнда 315) ва Фарғона (майда — 255, июнда — 575) вилоятларида эса деярли 2 баробарга ошган. Расмий статистика бўйича июнь ойида касалликка чалиниш (май ойига нисбатан) фақат Тошкент шаҳрида (14,8 фоизга), Тошкент (16,7 фоизга) ва Самарқанд (5,01 фоизга) вилоятларида камайган.
Эътиборга молик жиҳат — Жиззахда 2021 йил январь—май ойларида коронавирус юқтириб олиш билан боғлиқ жами 377 та ҳолат рўйхатга олинган бўлса, июннинг ўзида 518 та ҳолат қайд этилган. Қашқадарё (беш ойда — 233 та, июнда — 342 та) ва Фарғона (беш ойда — 462 та, июнда — 575 та) вилоятларида ҳам шу манзара. Қорақалпоғистон (беш ойда — 364 та, июнда — 274 та), Бухоро (беш ойда —373 та, июнда —357 та), Навоий (беш ойда —169 та, июнда —103 та), Наманган (беш ойда —370 та, июнда —315 та) ва Хоразмдаги (беш ойда — 438 та, июнда — 311 та) кўрсаткичлар ҳам шундай аянчли манзарага яқинроқ, дейиш мумкин.
Нималар қилинмоқда?
Рақамлардан кўриниб турибдики, Тошкентда апрель—май ойларида вазият оғирроқ эди, бироқ республика бўйича вазият айнан май—июнь ойларида кескинлашган (жамоатчилик фикрича, бу сўнгги ҳафталарда ҳудудларда ўтказилган фестиваллар ва бошқа оммавий тадбирлар билан боғлиқ бўлиши мумкин). Шу боис 2020 йил баҳорида жорий этилган ва шу вақтгача ҳали ҳеч тўлиқ бекор қилинмаган карантин 2021 йил 28 июнидан нисбатан кучайтирилиши, хусусан, Тошкентга вилоятлардан кириш-чиқишда чекловлар ўрнатилиши эълон қилинди (амалда бу чораларнинг фақат емакхоналар фаолиятини 20:00 дан кейин чеклаш қисми сезиларли ишламоқда, холос; Қашқадарёда бу чеклов соат 22:00 гача узайтирилган).Шунингдек, июль ойидан бошлаб Тошкент шаҳрида ўтган йил ёзида ташкил этилган, кейинчалик касалланиш ҳолатлари камайгач, консервация қилинган вақтинчалик ковид-марказлар фаолияти қайта тиклана бошлади. Айрим вилоятларда июнь охири — июль ойи бошида касалланиш бўйича янги антирекордлар қайд этилаётгани эътиборга олинса, яқин вақт ичида вилоятларда ҳам вақтинчалик ковид-марказлар фаолияти қайта тикланиши, айрим ҳудудларда (эҳтимол, республика бўйича) карантин чораларини нисбатан қатъийлаштириш, белгиланган талабларга риоя этилиши устидан назоратни янада кучайтириш бўйича навбатдаги қарорлар чиқарилиши мумкинлигини тахмин қилиш мумкин.
Изоҳ (0)