Bring a Trailer аукционида 1935 йилда ишлаб чиқарилган ноёб Duesenberg JN кабриолети 1,341 миллион долларга сотилиб, янги рекорд ўрнатди, деб хабар беради Motor. Маълумотларга кўра, ушбу кабриолетдан икки нусха (бошқа версияда уч нусха дейилади) яратилган ва улардан бири 25 июнь куни сотувга қўйилган. Орадан тўрт кун ўтиб, кабриолет ўзининг янги эгасини топган.
Duesenberg компаниясига 1913 йилда АҚШда асос солинган ва у фақат люкс ҳамда пойга автомобилларини ишлаб чиқаришга ихтисослашган. Ака-ука Дюзенбергларнинг моделлари қўлда йиғилгани учун юқори баҳоланиб келган. 1921 йилда Duesenberg автомобили ҳатто Франция Гран-присида ғолибликни қўлга киритган. Пойгадаги муваффақият янги инвесторларни жалб этиб, марка обрўсини кўтариб юборган. Шундан сўнг, у жуда тез оммалашиб, нафақат Америка, балки Европа бозорини эгаллаган. Duesenberg машиналари бойлик ва юқори мартаба рамзига айланган — уларни ҳатто Европадаги қироллик оилалари вакиллари ҳам харид қилишни бошлаган.
Бироқ 1929 йилнинг 29 октябридаги «қора пайшанба»да барчаси ўзгарган. АҚШ тарихидаги энг йирик биржа касоди ортидан жаҳон иқтисодиётида оғир даврлар бошланган. Инқироз бир нечта автомобиль ишлаб чиқарувчини яксон қилган, бироқ Duesenberg компанияси яна бир неча йил фаолият кўрсатиб, ҳатто J индекси остида 481 та машинасини чиқарган. Аммо 1937 йилда фирма ёпилган — бу ўша вақтда марказга эгалик қилган Корда молиявий империясининг касоди сабаб содир бўлган. Дюзенбергнинг сўнгги нусхаси 1938 йилдан 1940 йилга қадар йиғилган.
Сотувга қўйилган автомобиль JN индексига эга, компания эса ҳеч қачон бундан фойдаланмаган. Уни Duesenberg 1935 йилдан тўққизта шасси сотган Роллстон кузов ательеси ясаган. Турли маълумотларга кўра, уларнинг икки ёки учтасининг том қисми очиладиган бўлди. Аукционга қўйилган автомобиль бутун умрини хусусий коллекционерлар қўлида ўтказган. Кабриолет кузови бир неча бор реставрация жараёнида бўялган: аввалига қизил рангга, кейин сариқ ва охир-оқибат тўқ кўк рангга.
Bring а Trail аукциони орқали сотилган бундан олдинги рекорд 1956 йили Mercedes-Benz 300 SL Gullwing моделига тегишли бўлиб, у 2019 йилда 1 234 567 долларга сотилганди.
Изоҳ (0)