Тошкентдаги «Шаҳидлар хотираси» ёдгорлик мажмуасида 2021 йил апрель ойи ўрталаридан қурилиш-таъмирлаш ва ободонлаштириш ишлари бошланган эди. Мажмуа ҳудудидаги бу ишлар «қатағон қурбонларининг меросини чуқур ўрганиш ва улар хотирасини абадийлаштириш, ‘Шаҳидлар хотираси’ ёдгорлик мажмуасининг замонавий ва миллий дизайнини яратган ҳолда реконструкция қилиш ҳамда Қатағон қурбонлари хотираси давлат музейининг моддий-техник базасини мустаҳкамлаш мақсадида» бошланган.
Дастлабки режа бўйича, қатағон қурбонлари хотираси шарафига қурилган ротонда реконструкция қилиниши, қурбонларнинг номлари ёзилган рамзий китоб ўрнатилиши, музей ходимлари учун алоҳида маъмурий бино, мажмуа ҳудудида миллий ҳунармандчилик ва савдо дўконлари, сайр учун велотураргоҳлар, бир қатор суҳбат жойлари, очиқ амфитеатр ва Wi-Fi зонаси, болалар ва шахматчилар учун ўйин майдончалари ва ҳожатхоналар ташкил этилиши керак эди. Бироқ кейинчалик ротонда таъмири, рамзий китоб ўрнатилиши ва маъмурий бино қурилишидан бошқа барча объектлар лойиҳадан чиқариб ташланган.
Мажмуа, жумладан, ротондани реконструкция қилиш, қатағон қурбонлари исм-шарифлари ёзилган рамзий китоб ўрнатиш, музей ходимлари учун алоҳида маъмурий бино қуриш учун Mimar Group компанияси тендерсиз танлаб олинган. Қатағон қурбонлари хотираси музейини реконструкция қилиш учун эса Ижод-Ижод хусусий корхонаси танланган. Мажмуадаги объектлар қурилиши пойтахт ҳокимлигининг маҳаллий бюджети, шунингдек, пойтахтнинг бошқа ҳудудларидаги ерларни инвесторларга сотиш ҳисобидан молиялаштирилиши режалаштирилмоқда. Биринчи босқичда Тошкент ҳокимлиги 20 миллиард сўм ажратади, иккинчи босқичда сармоядорларга лотларни сотишдан тушган маблағлар, етмаган қисми эса шаҳар ҳокимлиги бюджетининг қўшимча манбалари ҳисобидан йўналтирилади.
Мавзуга доир: Тошкентдаги «Шаҳидлар хотираси» мажмуаси ҳудудидаги объектлар қурилиши қандай молиялаштирилади?
Мажмуадаги ишлар
«Дарё» мухбирлари объектда бўлиб, олиб борилаётган қурилиш-таъмирлаш ишлари билан танишди — ҳудуд катта қурилиш майдонига айланган, бироқ объектдаги масъулларнинг билдиришича, қурилиш-таъмирлаш ишлари давомида бирорта дарахт кесилмаган ва кесилмайди ҳам. Маълум бўлишича, мажмуа ҳудудидаги бетон ва гранит каби тошлар билан қопланган деярли барча иншоотлар (хусусан, фавворалар, тўсиқлар ва ҳ.к.) қайтадан бошқа турдаги мармар ва гранитлар билан қопланмоқда; Бўзсувнинг икки соҳилига ўрнатилган тўсиқлар ҳам мармар билан қоплаб чиқилмоқда (бунгача тўсиқларнинг юқори қисмига бетон плиталар ётқизилган, асос қисми эса тошлар билан безатилган эди. Канал устидан солинган кўприклар эса нақшинкор металл панжаралар билан безатилмоқда.
Изоҳ (0)