Наманганда журналистларнинг касб байрами арафасида янги медиа марказ очилди
Наманган муҳандислик-қурилиш институтида 27 июнь— Матбуот ва оммавий ахборот воситалари ходимлари куни арафасида медиа марказнинг очилиш маросими бўлиб ўтди. Бу ҳақда «Дарё» мухбири хабар бермоқда.
Тадбир олдидан матбуот анжумани ўтказилди. Унда институт ректори Шарифбой Эргашев ОАВ вакилларига Наманган муҳандислик-қурилиш институтининг бугунги куни ва истиқболдаги режалар ҳақида тўхталиб ўтди. Журналистларни қизиқтирган саволларга батафсил жавоб берди.
Олий ўқув юрти билан фаол ҳамкорлик қилиб келаётган бир гуруҳ ОАВ вакиллари байрам муносабати билан тақдирланди.
Шундан сўнг институт медиа марказининг очилиш маросими бўлиб ўтди.
Медиа марказ матбуот котиби хонаси ва студиядан иборат.
«Студияда фото ва видеолавҳалар тайёрлаш, интервьюлар олиш ҳамда кўрсатувлар ёзиш учун барча шароитлар яратилган. Жумладан, хона акустика талаблари асосида барпо этилган бўлиб, овоз ютиш хусусиятига эга, энг сўнгги русумдаги аудио ва видеотехника билан жаҳозланган», — дейди институт матбуот котиби Азизбек Абдувалиев.
Наманган муҳандислик-қурилиш институти медиа марказининг очилиш маросимида вилоят ҳокимининг ўринбосари Ботир Нуриддинов иштирок этди.
Мавзуга доир: Наманганда журналист ва блогерлар касб байрами арафасида мерганликда ўзини синаб кўрди
