Бухорода Хитой фуқаросининг 60 минг доллар, 20 минг юань ва 56 млн сўм пулларини ўғирлаган шахслар ушланди

Бухоро вилояти Ромитан туманида Хитой фуқаросининг жуда кўп миқдорда пулларини ўғирлаган шахслар қўлга олинди. Бу ҳақда Бухоро вилояти ИИБ матбуот хизмати хабар қилди.

Ромитан тумани ИИБ ҳузуридаги тергов бўлинмаси томонидан берилган маълумотга кўра, 2021 йилнинг 21 июнь куни соат 20:00 дан 22 июнь куни соат 06:00 га қадар бўлган вақт оралиғида номаълум шахс Қоқиштувон қишлоғида жойлашган, Хитой фуқароси 1976 йилда туғилган В.Б. раҳбарлик қилиб келаётган Хитойнинг йўл қурилиш корхонаси идораси жойлашган бинога ғайриқонуний равишда кириб, у ердан сейф ва ушбу сейф ичида бўлган 60 000 АҚШ доллари, 20 000 Хитой юани ва 56 миллион сўм пулларни яширин равишда ўғирлаб, ҳодиса жойидан номаълум томонга яширинган.

Мазкур ҳолат юзасидан келиб тушган хабар асосида зудлик билан жиноят иши қўзғатилиб, вилоят Ички ишлар бошқармаси бошлиғининг биринчи ўринбосари подполковник Мансур Қодиров ҳамда тергов бўйича ўринбосар полковник Оқил Ҳасанов раҳбарлигида Ички ишлар бошқармаси ҳамда туман ички ишлар бўлими ходимларидан иборат таркибда тергов-тезкор гуруҳи тузилиб, кечиктириб бўлмас суриштирув ҳамда тергов ҳаракатлари ўтказилиши натижасида жиноят фош этилди.

Ушбу жиноятни Ромитан тумани «Қоқиштувон» маҳалласида яшовчи, 1984 йилда туғилган П.С. ва унинг маҳалладоши 1974 йилда туғилган Х.У. бир гуруҳ бўлиб, олдиндан жиноий тил бириктириб содир этганликлари аниқланиб, гумон қилинувчилардан ашёвий далиллар тегишли тартибда ҳужжатлаштириб олинди ва жабрланувчи В.Б. раҳбарлик қилиб келаётган Хитойнинг йўл қурилиш корхонасига етказилган моддий зарар тўлиқ қопланди.

Ҳозирда гумон қилинувчиларга нисбатан Жиноят кодексининг 169-моддаси 4-қисми «а» банди (жуда кўп миқдорда ўғрилик) билан қўзғатилган жиноят иши бўйича қамоққа олиш тарзидаги эҳтиёт чораси қўлланилиб, дастлабки тергов ҳаракатлари давом эттирилмоқда.

Бундан аввал Фарғонада қайнонасининг тилла тақинчоқларини ўғирлаган келинга жиноят иши қўзғатилгани, Наманганда уч кишининг жами 50 миллион сўмлик қорамолларини ўғирлаган ўқувчиларга нисбатан жиноят иши қўзғатилгани ҳамда Фарғонадаги бозорда ўзганинг сумкасидан пул ва телефон ўғирлаган 36 ёшли аёл ушлангани ҳақида хабар берилганди.