Тошкент метросининг «Олмазор» бекатида барча йўловчилар тушириб юборилганига изоҳ берилди

20 июнь куни Тошкент метрополитени «Олмазор» бекатида барча йўловчилар тушириб юборилди. Метрополитен матбуот хизмати мазкур ҳолатга изоҳ берди.

Маълум қилинишича, соат 22:10 да Чилонзор йўналиши «Олмазор» бекатидан «Бекат-1» томон ҳаракатни бошлаган поезд машинисти носозликни аниқланган.

«Йўловчиларни ҳамда ҳаракат хавфсизлигини таминлаш мақсадида йўловчилар ‘Олмазор’ бекатида туширилган. Носозликни аниқлаш мақсадида ҳаракат таркиби электродепога жўнатилган. Келтирилган носозликлар учун йўловчилардан узр сўраймиз», — дейилади Тошкент метрополитени хабарида.

Сўнгги вақтларда Тошкент метрополитени билан боғлиқ шу каби воқеалар тез-тез юз бермоқда. Хусусан, 13 май куни «Амир Темур хиёбони» бекатида барча йўловчилар тушириб юборилганди. 7 май куни соат 21:10 дан 22:00 гача Тошкент метрополитени Ҳалқа йўлининг 7-бекатида электр энергияси ўчиб қолганди.

9 апрель куни ижтимоий тармоқларда поезднинг очиқ эшиклар билан ҳаракати туширилган видео тарқалди. Шу билан бирга, метрополитендаги ерости ва ерусти поезд ҳаракатларининг бир нечта бошқа видеолари ҳам ижтимоий тармоқларда кўп бора муҳокама қилинди. 28 апрель куни эса туннелда тўхтаб қолган поезд ҳақидаги видео тарқалди, унда йўловчилар рельслар орқали ҳаракатланиб, бекатга етиб олгани тасвирланган.

18 март куни эса «Олмазор» (Чилонзор йўли) ва «Бекат-1» (Сергели йўли) орасидаги туннелда икки поезд тўқнашганди. 12 июнда Тошкентдаги метро бекатларининг биридан шубҳали буюм топилгани сабаб йўловчилар поезддан тушириб юборилган.