Тошкент шаҳар ҳокимлиги ҳузуридаги Жамоатчилик кенгаши кўп қаватли уйлар ён деворларидаги мозаикаларга маданий-тарихий мерос мақоми беришни таклиф қилмоқчи.
Бу ҳақда Тошкент шаҳар ҳокимлиги ҳузуридаги Жамоатчилик кенгашининг 16 июнда ўтказилган навбатдаги мажлисида маълум қилинган. Мажлисда бир неча масалалар, шу жумладан, кўп қаватли уйлар ён деворларидаги мозаиканинг устидан бўялиши масаласи муҳокама қилинган.
«Podrobno.uz»нинг қайд этишича, сўнгги йилларда туман ободонлаштириш бошқармалари совет давридаги ушбу ноёб маданий меросни аста-секин йўқ қилмоқда. Аксарият мозаика паннолари аллақачон йўқ қилиб бўлинган ёки аянчли аҳволда. Шаҳарда ушбу ноёб асарларни сақлаб қолиш ва қайта тиклаш билан давлат даражасида шуғулланадиган мутахассислар йўқ.
Пойтахт ҳокимлиги ҳузуридаги Жамоатчилик кенгаши Тарихий мерос департаментига шаҳар мозаикасига маданий-тарихий мерос мақомини бериш таклифини йўллашга қарор қилган.
Эслатиб ўтамиз, 2019 йилда Чилонзор туманидаги уйлардан бирида беларуслик қурувчилар томонидан яратилган мозаика бўялгани ҳақида тарқалган хабарлардан сўнг Тошкент шаҳар ҳокимлиги томонидан уни тиклаш чораси кўрилганди. Ундан бир йил аввал Тошкент шаҳри ҳокимлиги ҳузуридаги Жамоатчилик кенгаши Parkent Plaza жамоаси билан биргаликда Юнусобод туманидаги уйларнинг бирида бўёқ сурилган мозаикани тўғрилаш ва қайта тиклаш ишларини амалга оширганди.
Мавзуга доир: Фотожамланма: Тошкентнинг энг ноодатий мозаикалари
Изоҳ (0)