Намангандаги Президент мактабини 24 нафар илк битирувчи тамомлади. Бу ҳақда «Дарё» мухбири Азизбек Абдувалиев хабар бермоқда.
Президент мактаби Наманган шаҳрида 2019 йили давлат раҳбарининг вилоятга ташрифи чоғида берилган топшириққа биноан ташкил этилган эди. Ўшанда мактабнинг 5—10-синфларига 7700 нафардан ортиқ талабгордан 142 нафари танлаб олинган.
Президент мактабида ўқув жараёни Кембриж университети билан ҳамкорликда ишлаб чиқилган ўқув режа ва дастурлар асосида инглиз тилида амалга оширилмоқда. 2021 йил бошида мазкур мактаб Cambridge Assessment International Education ташкилоти аккредитациясидан ўтиб, Cambridge International School (Кебриж халқаро мактаби) мақомига эга бўлди.
Наманган шаҳридаги Президент мактабига 8 нафар чет эллик юқори малакали мутахассис АҚШ, Буюк Британия, Янги Зеландия, Филиппин ва Жанубий Африка каби давлатлардан танлаб олиниб, дарс машғулотларига жалб қилинди. Шунингдек, 21 нафар малакали маҳаллий муаллим ҳам ўқувчиларга сабоқ берди.
— Фахр билан айтишимиз мумкинки, илк битирувчиларнинг барчалари дунёнинг етакчи университетларига муддатидан аввал қабул қилинди. Жумладан, Жаҳонгир Ҳабибуллаев топ—300 рўйхатига кирган 8 та, Шуҳрат Абдусаломов эса 7 та олий ўқув юртига ўқишга кириш таклифини олди. Дониёр Эркинов АҚШнинг Дьюк Куньшань университети, Раҳматилла Абдубаев эса Қатарнинг Жоржтаун университетида ўқиш харажатлари тўлиқ қопланадиган грант соҳиблари бўлди, — дейди мактаб директори Абдурасул Пирназаров.
Президент мактаби битирувчиларининг «Сўнгги қўнғироқ» тадбирида вилоят ҳокими Шавкат Абдураззоқов иштирок этди.
Изоҳ (0)