Бухорода ҳамшираликка ишга жойлаштиришни ваъда қилиб, фуқародан 1700 доллар олган шахс қўлга олинди. Бу ҳақда «Дарё»га Бош прокуратура ҳузуридаги Департаментнинг Бухоро шаҳар бўлими хабар берди.

Таъкидланишича, Бухоро шаҳрида яшовчи 27 ёшли Б.М. фуқаро М.Т.ни Республика шошилинч тиббий ёрдам илмий марказининг Бухоро филиалига тўлиқ «ставка»да ҳамшираликка жойлаштириб қўйишни ваъда қилган. Ва эвазига 1700 доллар беришни талаб қилган. Анчадан буён иш билан банд бўлмаган М.Т. бунча миқдордаги пулни пора эвазига беришга имкони етмаслиги боис ҳолатни ҳуқуқ-тартибот идораларига билдиришга мажбур бўлган.

Ҳуқуқни муҳофаза қилувчи идоралар ходимлари томонидан ўтказилган текзор тадбирда Б.М. М.Т.дан кимёвий ишлов берилган 1700 долларни олаётган вақтда ушланган.

Мазкур ҳолат юзасидан Жиноят кодексининг 168-моддаси 2-қисми «б» банди (фирибгарлик) ва 211-моддаси 1-қисми (пора бериш) билан жиноят иши қўзғатилиб, дастлабки тергов ҳаракатлари олиб борилмоқда.