Коронавирус ўчоғига айланган Копа Америка, Golden Boy’га даъвогар «олтин бош»лар, Еврода яна серб-албан муаммоси. Энг сўнгги спорт янгиликлари

Дунё футболига оид 15 июнь куннинг муҳим хабарлари дайжести билан танишинг.

Golden Boy совринига даъвогарларнинг дастлабки рўйхати тасдиқланди

Италиянинг Tuttosport нашри Европанинг 21 ёшгача бўлган энг яхши футболчисига топшириладиган Golden Boy совринига номзод 100 нафар ўйинчи номини эълон қилди. Рўйҳатдан Жуд Беллингҳем («Боруссия Д»), Эдуардо Камавинга («Ренн»), Амад Диалло, Мэйсон Гринвуд (иккиси – «Манчестер Юнайтед»), Илайш Мориба, Педри, Эрик Гарсия (барчаси – «Барселона»), Родриго Гоэс, Такефуса Кубо (иккиси – «Реал»), Габриэль Мартинелли, Букайо Сака (иккиси – «Арсенал»), Кёртис Жонс («Ливерпуль»), Даниэль Мальдини («Милан»), Жамал Мусиала («Бавария»), Анатолий Трубин («Шахтёр»), Иля Забарний («Динамо» Киев») ва бошқа футболчилар жой олди.

Копа Америкада навбатдаги муаммо

Бразилияда ўтаётган Америка Кубоги—2021 мусобақаси иштирокчилари орасида коронавирус кенг тарқалмоқда. Бразилия соғлиқни сақлаш вазирлигининг хабар қилишича, иштирокчилар орасида 2927 та тест ўтказилган. Таҳлиллардан кейин 41 та коронавирусга чалиниш ҳолати қайд этилган. Зарарланганлар орасида 20 га яқин футболчилар борлиги айтилмоқда, бироқ уларнинг номлари ошкор этилмаган. 4 та терма жамоа бундан зарар кўрган.

Хабарларга таяниладиган бўлса гап Венесуэла (10 га яқин зарарланган футболчи), Боливия (4-5), Колумбия ва Перу жамоалари ҳақида кетмоқда.

Австрия вакили Марко Арнаутович миллатчиликда айбланмоқда

Австрия терма жамоаси ҳужумчиси Шимолий Македонияга қарши кечган ўйинда рақиб футболчиларини ҳақорат қилган. Бу учрашув назоратчисининг қайдномасига киритилган. УЕФА мазкур ҳолат юзасидан иш очди.

Таъкидланишича, келиб чиқиши сербиялик бўлган Арнаутович албанлардан бўлган Эгзон Бейтулаи ва Эзжан Алиоскининг келиб чиқишини (онасини) ҳақорат қилган.

Евро—2020 даги жароҳатлар ҳақида

«Манчестер Юнайтед» дарвозабони Дин Ҳендерсон болдиридан жароҳат олди ва Англия терма жамоаси тасарруфини тарк этди. Унинг ўрнини «Шеффилд Юнайтед» посбони Аарон Рэмсдейл эгаллади.

Шунингдек, Россия терма жамоасининг тажрибали футболчиси Юрий Жирков ҳам катта эҳтимол билан мусобақа охиригача сафдан чиқди. Бу ҳақда руслар бош мураббийи Станислав Черчесов маълум қилди. Жирков Бельгияга қарши 1-тур ўйинида жароҳат олганди.

Эриксендан мурожаат

Евро—2020 1-турида юрак билан боғлиқ муаммога учраган Дания терма жамоаси ярим ҳимоячиси Кристиан Эриксен Instagram саҳифаси орқали мухлислар ва жамоадошларига мурожаат қилди.

«Барчага салом. Ёқимли ва ажойиб тилаклар учун дунёдаги барча инсонларга раҳмат айтаман. Бу мен ва оилам учун кўп нарсани англатади. Бошдан ўтказган вазиятимни инобатга олсак, мен билан ҳаммаси жойида. Шифохонада яна бир қатор текширувлардан ўтишим керак, бироқ ўзимни яхши ҳис қиляпман.

Энди кейинги ўйинларда Дания терма жамоасига мухлислик қиламан. Бутун Дания учун ўйнанг!», — дея ёзади Эриксен.