Ҳукуматнинг 12 июндаги қарори билан Ўзбекистон Тиббий-ижтимоий хизматларни ривожлантириш агентлиги тўғрисидаги низом тасдиқланди, деб хабар бермоқда Адлия вазирлиги матбуот хизмати.
Низомга кўра, Тиббий-ижтимоий хизматларни ривожлантириш агентлигининг асосий вазифалари, функциялари, ҳуқуқлари ва жавобгарлигини, шунингдек, фаолиятини ташкил этиш тартиби белгиланди.
Агентликнинг асосий вазифаларидан бири этиб, жумладан, кексалар, ногиронлиги бўлган шахслар ва аҳолининг ижтимоий ҳимояга муҳтож бошқа тоифаларига тиббий-ижтимоий хизмат кўрсатиш соҳасида ягона давлат сиёсатини амалга ошириш белгиланди.
Агентликка Президент билан келишган ҳолда Вазирлар Маҳкамаси томонидан лавозимга тайинланадиган ва лавозимдан озод этиладиган директор раҳбарлик қилади.
Шунингдек, агентлик таркибида юридик шахс ҳисобланмайдиган, Ногиронлиги бўлган шахсларни қўллаб-қувватлаш жамғармаси ҳамда бюджетдан ташқари «Мурувват» ва «Саховат» интернат уйларини қўллаб-қувватлаш жамғармаси фаолият юритади.
Агентлик ўз фаолиятида Вазирлар Маҳкамасига бўйсунади ва ҳисобот беради.
Эслатиб ўтамиз, Президентнинг 2021 йил 25 мартдаги «Кекса ва ногиронлиги бўлган шахсларни ижтимоий қўллаб-қувватлаш, ‘Саховат’ ва ‘Мурувват’ интернат уйлари тизимини янада ривожлантириш тўғрисида»ги фармонига асосан Соғлиқни сақлаш вазирлиги ҳузуридаги Тиббий-ижтимоий хизматлар агентлиги ва унинг ҳудудий бўлинмалари негизида Тиббий-ижтимоий хизматларни ривожлантириш агентлиги ва унинг ҳудудий бўлинмаларини ташкил этиш белгиланганди.
Ўзбекистон ҳукуматининг 13 апрелдаги қарори билан Тиббий-ижтимоий хизматларни ривожлантириш агентлиги раҳбарияти тайинланди.
Изоҳ (0)