Янги Ўзбекистон деган ном бугун дунё ҳамжамияти томонидан Ўзбекистонга нисбатан жуда катта ҳурмат ва эътироф сифатида жарангламоқда. Бу ҳақда 10 июнь, пайшанба куни ўтказилган «Маънавият фестивали» матбуот анжуманида Республика маънавият ва маърифат маркази раҳбари Минҳожиддин Ҳожиматов фикр билдирди, дея хабар бермоқда «Дарё» мухбири Миролим Исажонов.
Тадбир аввалида сўзга чиққан Республика маънавият ва маърифат маркази раҳбари бугунги ислоҳотлар ҳақида гапираркан, хусусан, шундай деди:
«Бугун ҳаммамиз бир янги даврда яшаяпмиз. Янги Ўзбекистон деган атама бугун жаҳон ҳамжамияти томонидан Ўзбекистонга нисбатан жуда катта ҳурмат, эҳтиром, эътироф сифатида жаранглаяпти. Янги Ўзбекистон деган бу атама Ўзбекистонга ярашиб турибди, буни доим ғурур билан айтаман. Чунки Ўзбекистонда муҳтарам Президентимиз бошчилигида бўлаётган ўзгаришлар, ислоҳотлар, шиддатли жараёнлар, энг муҳими, жаҳон ҳамжамиятида янги бир маънавий мезон кириб келдики, бу ҳар қандай соҳадаги ислоҳот, янгилик бўлмасин, унинг моҳияти ўлчовида халқнинг ризолиги туриш керак.
«Сен қилаётган ишларингдан халқ розими, халқнинг турмуши, оиласи, ҳаёти яхшиланяптими, ёшларнинг иқтидорларини юзага чиқариш учун имкониятлар эшиги очиляптими, кўзи ёшга тўлган, ҳаётда боқувчисини йўқотган, ҳаётнинг кутилган, кутилмаган қийинчиликларига дуч келган инсонларга таянч, суянч, мадор бўладиган ишлар қилиняптими?», деган сўзлар билан ўлчаняпти.
Мен кеча бир учрашувда айтдим, аёллар дафтари, ёшлар дафтари, темир дафтар деган сўзлар мана ҳаётимизга кириб келди. Буларнинг ҳаммасини умумлаштириб, нима деб аташ мумкин, дейишса, мен ‘меҳр дафтари’, ‘одамийлик дафтари’, ‘инсонийлик дафтари’, ‘оқибат дафтари’, ‘саҳоват дафтари’ деб айтгим келади. Фестивальнинг асосий мақсади – мана шу ислоҳотларни бор кўлами билан ўзида намоён этиб, халқимизга етказишдир», — деди Минҳожиддин Ҳожиматов.
Таъкидланишича, фестиваль доирасида «Янги Ўзбекистон – янги ренессанс сари!», «Маърифат улашиб», «Мақом кечалари», «Бир нуроний – беш нафар ёшга мураббий», «Бир зиёли – бир маҳаллага маънавий ҳомий» каби ўнлаб лойиҳалар ўтказилади. Шунингдек, барча туман ва шаҳарларда «Маҳмудхўжа Беҳбудий», «Ота уй», «Элпарвар», «Исҳоқжон Ибрат», «Иссиқ нон» сингари йигирмага яқин ўзбек фильмлари намойиш этилади.
Изоҳ (0)