Ўзбекистонда дам олиш кунлари ёз фаслининг боши учун меъёрий қийматлардан 7-10 даражага юқори бўлган аномал иссиқ об-ҳаво бўлиши давом этади, деб хабар бермоқда «Ўзгидромет».
Кундуз кунлари ҳаво ҳарорати 40-43 даражагача, жанубда ва чўл ҳудудларида баъзи жойларда 44-46 даражагача исийди. Кечалари эса 22-27 даража атрофида, республиканинг чўл ҳудудларида баъзи жойларда 30 даражагача бўлади.
«Ўзгидромет»нинг қайд этишича, ҳаво ҳарорати 2 метр баландликда ва сояда ўлчанади. Қуёшли ва ундан қизиган жойларда ҳарорат ундан ҳам юқори бўлиши мумкин.
Республика ҳудудининг катта қисмида бу ёзнинг энг иссиқ бошланишидир. Хусусан, Тошкентда шу йилгача июнь ойининг биринчи ҳафтасида ҳароратнинг мутлақ (абсолют) максимуми 37-39 даражадан ошмаган.
Дам олиш кунлари республика бўйича шамол баъзи жойларда чангли бўрон билан 17-22 метр/секундгача кучайиши кутилмоқда. 5—6 июнь кунлари айрим тоғли ҳудудларда кечга томон конвектив булутлилик ривожланишида момақалдироқ билан қисқа муддатли ёмғир ёғиши эҳтимоли бор.
Эслатиб ўтамиз, Ўзбекистонда 31 майдаги ҳарорат мутлақ максимумга етганди.
Изоҳ (0)