Андижонда 100 гектар ер ажратиб бериш эвазига 128 минг доллар пора олган мансабдор шахсларга суд ҳукми ўқилди

Жиноят ишлари бўйича Андижон вилоят судида бугун, 4 июнь куни 100 гектар ер ажратиб бериш эвазига 128 минг доллар пора олган тўрт нафар мансабдор шахсга ҳукм ўқилди. Бу ҳақда «Дарё» мухбири Умиджон Мамарасулов хабар берди.

Маълум бўлишича, Андижон вилоят ҳокимлиги ҳузуридаги Кичик саноат зоналарини бошқариш ягона дирекцияси бош мутахассиси лавозимида ишлаган А.О., «Универсал водий гипс» МЧЖ раҳбари лавозимида ишлаган У.А., фуқаро А.У.лар олдиндан тил бириктириб, жабрланувчи Д.I.дан Хўжаобод туман ҳокимлигида ишлайдиган танишлари орқали туман ҳудудидан чорвачилик фермер хўжалиги ташкил этиш учун унга жами 100 гектар ер майдони ажратиб, ҳужжатларини тайёрлаб бериш эвазига фирибгарлик йўли билан жами 135 минг доллар талаб қилган.

Судланувчилар жабрланувчи Д.I.дан 2021 йил 26 март куни талаб қилинган пуллар ҳисобидан дастлаб 7 минг долларини олиб, 29 март куни қолган 128 минг долларни Андижон шаҳар, Бўстон даҳасида жойлашган «УзДонгЯнг-Ко» қўшма корхонаси олдида олаётганида ДХХ ҳамда Иқтисодий жиноятларга қарши курашиш департаментининг вилоят бошқармаси ходимлари ҳамкорлигидаги тезкор тадбир давомида ушланган.

Шунингдек, шу куни А.О.нинг ихтиёрий розилигига кўра давом эттирилган тезкор тадбирда Иқтисодий тараққиёт ва камбағалликни қисқартириш бош бошқармаси хўжалик мудири-ғазначиси лавозимида ишлаган С.У. талаб қилинган пуллардан ўзига тегишли қисми, яъни 70 минг долларни А.О.дан Республика шошилинч тез тиббий ёрдам илмий маркази Андижон филиалининг автотураргоҳида олаётган вақтида қўлга олинган.

Юқоридаги қайд этилган жиноий ҳаракатлар учун О.А. ҳамда У.С. Жиноят кодексининг 168-моддаси 4-қисмининг «а» банди (жуда кўп миқдорда фирибгарлик) 211-моддаси 3-қисмининг «а» банди (жуда кўп миқдорда пора бериш) билан айбли деб топилиб, 3 йил мансабдорлик лавозимлари ва моддий жавобгарлик юклатилган вазифаларида ишлаш ҳуқуқидан маҳрум қилинган ҳолда 10 йил 6 ой муддатга, У.А. ҳамда А.У.ларга эса 10 йил 2 ой муддатга озодликдан маҳрум қилиш жазоси тайинланган.

Аввалроқ Президент Шавкат Мирзиёев раислигида ўтказилган видеоселектор йиғилишида давлат раҳбари коррупция иллати ва унга қарши курашиш ҳақида сўз юритиб, Андижон вилоятидаги коррупция ҳолатларини танқид қилганди.