Prezident Shavkat Mirziyoyev raisligida o‘tkazilgan videoselektor yig‘ilishida davlat rahbari korrupsiya illati va unga qarshi kurashish haqida so‘z yuritdi, deya xabar bermoqda “Daryo” muxbiri.

“Hududlarga ajratilayotgan kredit va budjet mablag‘larini maqsadsiz ishlatish, talon-toroj qilish va korrupsiya holatlari hamon uchrab turibdi.

Yo‘ldoshev, Bobojonov, Burxonov, Bosh prokuratura departamenti ajratiladigan mablag‘larning har bir so‘mini samarali va maqsadli ishlatilishi ustidan doimiy va ta’sirchan nazorat o‘rnatsin. Andisha qilish davri tugadi. Hamma birdek: qonun — ustuvor, jazo — muqarrar”, — dedi davlat rahbari.

Prezidentning ta’kidlashicha, O‘zbekistonning yanada rivojlanishiga korrupsiya va tanish-bilishchilik hamon katta to‘siq bo‘lmoqda.

“Pandemiya davrida xalqimizga moddiy yordam ham berdik. Lekin shuni hamma ham qadriga yetmayapti. Shunday og‘ir sharoitda iqtisodiyotimizni tiklash qanchalik mashaqqatli bo‘layotganligini ba’zi hokimlar, rahbarlar chuqur anglamayapti”, – dedi Shavkat Mirziyoyev.

Shuningdek, Prezident Andijon viloyatidagi korrupsiya holatlarini tanqid qildi.

“Xalqimizning oldida uzr so‘rab, oxirgi marta sizlarni ogohlantirmoqchiman… Mana, Samarqand viloyati hokimining o‘zi gapirib bersin, pastki bo‘g‘inda, maktabgacha ta’lim, tibbiyotda qancha poraxo‘rlar borligini. Mana Andijonda viloyat hokimligining bitta noinsofi 128 ming dollar, 30 ming dollar olayapti. Nima, Abdurahmonov (Andijon viloyati hokimi — tahr.), xizmatning rahbari bilmaydimi? Prokurori bilmaydimi? Abdurahmonov sezmaydimi atrofida kim yurganini? Bitta odamni norozi qilib, 5 dollar olgan bo‘lsa ham prezidentning siyosatiga xiyonat deyiladi”, — dedi Shavkat Mirziyoyev.

Bundan avval Shavkat Mirziyoyev Milliy bank qoshida xizmatlarni rivojlantirish bo‘yicha loyiha-tahliliy markazi tashkil etilishi, xizmat ko‘rsatish sohasiga mas’uliyatsizlik qilgan 27 nafar rahbar lavozimidan olinib, 54 nafariga intizomiy jazo berilganini hamda pandemiya davrida xizmat ko‘rsatish sohasidagi tadbirkorlarni qo‘llab-quvvatlash uchun 35 trillion so‘mlik ko‘mak berilganini ma’lum qilgandi.