Jinoyat ishlari bo‘yicha Andijon viloyat sudida bugun, 4-iyun kuni 100 gektar yer ajratib berish evaziga 128 ming dollar pora olgan to‘rt nafar mansabdor shaxsga hukm o‘qildi. Bu haqda “Daryo” muxbiri Umidjon Mamarasulov xabar berdi.
Ma’lum bo‘lishicha, Andijon viloyat hokimligi huzuridagi Kichik sanoat zonalarini boshqarish yagona direksiyasi bosh mutaxassisi lavozimida ishlagan A.O., “Universal vodiy gips” MCHJ rahbari lavozimida ishlagan U.A., fuqaro A.U.lar oldindan til biriktirib, jabrlanuvchi D.I.dan Xo‘jaobod tuman hokimligida ishlaydigan tanishlari orqali tuman hududidan chorvachilik fermer xo‘jaligi tashkil etish uchun unga jami 100 gektar yer maydoni ajratib, hujjatlarini tayyorlab berish evaziga firibgarlik yo‘li bilan jami 135 ming dollar talab qilgan.
Sudlanuvchilar jabrlanuvchi D.I.dan 2021-yil 26-mart kuni talab qilingan pullar hisobidan dastlab 7 ming dollarini olib, 29-mart kuni qolgan 128 ming dollarni Andijon shahar, Bo‘ston dahasida joylashgan “UzDongYang-Ko” qo‘shma korxonasi oldida olayotganida DXX hamda Iqtisodiy jinoyatlarga qarshi kurashish departamentining viloyat boshqarmasi xodimlari hamkorligidagi tezkor tadbir davomida ushlangan.
Shuningdek, shu kuni A.O.ning ixtiyoriy roziligiga ko‘ra davom ettirilgan tezkor tadbirda Iqtisodiy taraqqiyot va kambag‘allikni qisqartirish bosh boshqarmasi xo‘jalik mudiri-g‘aznachisi lavozimida ishlagan S.U. talab qilingan pullardan o‘ziga tegishli qismi, ya’ni 70 ming dollarni A.O.dan Respublika shoshilinch tez tibbiy yordam ilmiy markazi Andijon filialining avtoturargohida olayotgan vaqtida qo‘lga olingan.
Yuqoridagi qayd etilgan jinoiy harakatlar uchun O.A. hamda U.S. Jinoyat kodeksining 168-moddasi 4-qismining “a” bandi (juda ko‘p miqdorda firibgarlik) 211-moddasi 3-qismining “a” bandi (juda ko‘p miqdorda pora berish) bilan aybli deb topilib, 3 yil mansabdorlik lavozimlari va moddiy javobgarlik yuklatilgan vazifalarida ishlash huquqidan mahrum qilingan holda 10 yil 6 oy muddatga, U.A. hamda A.U.larga esa 10 yil 2 oy muddatga ozodlikdan mahrum qilish jazosi tayinlangan.
Avvalroq Prezident Shavkat Mirziyoyev raisligida o‘tkazilgan videoselektor yig‘ilishida davlat rahbari korrupsiya illati va unga qarshi kurashish haqida so‘z yuritib, Andijon viloyatidagi korrupsiya holatlarini tanqid qilgandi.
Mavzuga doir:
- “Nimaga korrupsiya bo‘lyapti? Nimaga yer sotyapti? Qayerga qarayapti bu noinsoflar?” — Mirziyoyev korrupsiyaga qarshi kurash kuchaytirilishini ma’lum qildi
- “Ikki yilda 100 ga yaqin mansabdor jinoiy javobgarlikka tortilgan” – Shavkat Mirziyoyev uy-joy kommunal xizmat ko‘rsatish sohasidagi talon-torojliklar haqida
Izoh (0)