Фарғона вилоятида май ойининг иккинчи душанбасидан учинчи душанбасигача бўлган (10—17 май) оралиқда рўйхатга олинган 20 та йўл-транспорт ҳодисаси (ЙТҲ) оқибатида жами 20 киши ҳалок бўлди, яна 18 киши тан жароҳати олган. Вилоят ИИБ Йўл ҳаракати хавфсизлиги бошқармаси (ЙҲХБ) ахборотига кўра, ЙТҲлар сони аввалги ҳафтага нисбатан 10 тага, ЙТҲ оқибатидаги қурбонлар сони 16 нафарга, жароҳатланганлар сони 12 нафарга кўпайган. Эътиборга молик томони, вилоятда 2021 йилнинг дастлабки тўрт ойи (17 ҳафта) давомида юз берган 328 та ЙТҲ оқибатида 64 киши ҳалок бўлган эди.

Вилоят ИИБ ЙҲХБ ахборотида 10—17 май кунлари юз берган 20 та ЙТҲнинг айнан нечтасида инсон ўлими билан боғлиқ ҳолатлар қайд этилганига аниқлик киритилмаган. Республика ИИВ, ИИВ Йўл ҳаракати хавфсизлиги бош бошқармаси, вилоят ИИБ ва ЙҲХБ томонидан юқорида кўрсатилган саналарда юз берган барча (20 та) ЙТҲ ҳақида ахборот берилмаган. «Дарё» очиқ манбалардаги маълумотларга асосланиб, юқорида кўрсатилган саналар оралиғидаги ҳафтада юз берган ва инсон ўлими билан тугаган жами 5 та ЙТҲни аниқлади. Улар орасида олти кишининг умрига зомин бўлган Ёзёвондаги авария ҳам бор.

10 май куни соат тахминан 3:50 да А-373 «Тошкент—Ўш» йўлининг Ёзёвон тумани «Гулистон» маҳалласи ҳудудидан ўтган 364-километрида Бухоро вилояти Вобкент туманида яшовчи Б.Қ. бошқарувидаги Cobalt (унинг салонида Қирғизистондаги университетларда ўқийдиган ўзбекистонлик талабалар бўлган) қарама-қарши йўналишга чиқиб, олдидан келаётган, Наманган вилоятидан Қўқон томон йўлга чиққан Д.С.нинг Cobalt автомашинаси (унинг салонида наманганлик бир оила вакиллари бўлгани айтилмоқда) билан тўқнашган.

Кадр: Telegram / @yhxbb_uz

Ҳодиса оқибатида олти киши — Бухородан келаётган Cobalt’даги бухоролик икки ва сурхондарёлик бир талаба йигит, шунингдек, Намангандан келаётган Cobalt’даги икки аёл ва етти ойлик чақалоқ ҳалок бўлган. Яна тўрт киши реанимация бўлимига ётқизилган. ЙТҲга ҳайдовчиларнинг шошма-шошарлиги, рулда ухлаб қолиши, шунингдек, А-373 «Тошкент—Ўш» йўлининг 350-километридан 368-километригача бўлган қисмидаги қарама-қарши ҳаракатланиш бўлакларини ажратиб турувчи бетон тўсиқлар ўрнатилмагани сабаб бўлган бўлиши мумкин, деб тахмин қилинмоқда.

Шу куни соат тахминан 8:50 да «Марғилон—Олтиариқ—Риштон—Каримдевона» йўлида машина тезлигини кескин ошириб, қувиб ўтиш қоидасини бузиб ҳаракатланган Cobalt автомобили бошқарувни йўқотиб, ағдарилиб кетган. Ҳодиса оқибатида Cobalt ҳайдовчиси вафот этган.

«Марғилон—Олтиариқ—Риштон—Каримдевона» йўлида юз берган авария оқибати.

Фото: Telegram / @fergana_yhxb

12 май куни соат тахминан 6:00 да Бағдод тумани «Мурувват» маҳалласи Кенагас қишлоғида 1985 йилда туғилган ҳайдовчи Ж.Ш. бошқарувидаги Nexia йўл четидаги симёғочга бориб урилган. Ҳодиса оқибатида 2006 йилда туғилган 8-синф ўқувчиси оғир тан жароҳати олиб, ҳодиса жойида ҳалок бўлган. Тан жароҳати олганлар ҳақида аниқ маълумот йўқ.

15 май куни Данғара тумани «Чинобод» маҳалласи ҳудудида Cobalt автомобили йўл четида тўхтаб турган «Зил» юк машинасининг тиркамасига бориб урилиши оқибатида енгил машина йўловчиси Қ.Ғ. воқеа жойида ҳалок бўлган, машинадаги яна бир йўловчи Т.У. ва йўл четида бўлган вояга етмаган пиёда Б.Б. тан жароҳати билан шифохонага ётқизилган. Т.У. ва Б.Б.нинг жароҳатлари даражаси ва уларнинг ҳозирги аҳволи ҳақида аниқ маълумот йўқ.

Кадр: «Янги Давр»

Шу куни соат 22:50 да Учкўприк тумани Бекобод қишлоғидаги чорраҳада 1988 йилда туғилган ҳайдовчи бошқарувидаги «Камаз» юк машинаси чорраҳага яшил чироқда кириб, қарама-қарши томондан чорраҳага кириб келаётган Nexia’га йўл бермай, чап томонга бурилаётган вақтида тўқнашув юз берган. Ҳодиса оқибатида Nexia’нинг 31 ёшли ҳайдовчиси воқеа жойида, унинг 50 ёшли йўловчиси (аёл) Учкўприк туман касалхонасида вафот этган.

Шундай қилиб, ушбу бешта ҳодиса оқибатида жами 11 киши, жумладан, уч нафар аёл ва икки нафар вояга етмаган шахс ҳалок бўлган. Яна камида етти киши тан жароҳати олиб, касалхонага ётқизилган.