Lexus компанияси янги LC кабриолети совуқ ҳаво шароитида ноодатий синовдан ўтказилгани тасвирланган видеоролик билан бўлишди. Автомобильни йиғиш сифатини текшириш вақтида у саноат музлаткичига Цельсий бўйича -18 даража совуққа 12 соатга жойлаштирилган, деб хабар беради Motor.
Lexus LC’нинг ўзига хос синови Милбрук шаҳридаги ихтисослашган полигондаги иқлим камерасида амалга оширилган. Бу ерда ҳимоя қурилмаларининг мустаҳкамлиги текширилади, шунингдек, Цельсий бўйича +85 даражадан -60 даражагача бўлган йўл-транспорт воситалари синовдан ўтказилади. Тест учун муҳандислар камерага -18 даражани ўрнатган, кабриолет кузови устидан сув қуйган, шунингдек, автомобиль интерьери кўриниб туриши учун унинг том қисми йиғиб қўйилган. Бу каби шароитда Lexus LC 12 соат давомида турган.
Экстремал даражадаги совуқдан сўнг мутахассислар машинани пойга йўли бўйлаб ҳаракатлантирган. Ҳайдовчи сифатида муҳандислар Пол Свифт исмли профессионал каскадёрни чақирган ва у ҳеч қандай қийинчиликсиз 457 от кучига эга Lexus LC’ни ўт олдирган. Бундан ташқари, синовчининг таъкидлашича, кабриолетнинг барча дисплей ва датчиклари бир зумда ишга тушган.
Трассага чиқиши билан ҳайдовчи рул ва ўриндиқларни иситиш тизимини ёққан. Синов мураккаб бурилиш ва ўнқир-чўнқирликларга эга йўналишда амалга оширилган. Ҳаракат вақтида кабриолетдан муз бўлаклари ажралиб тушган, бироқ бу каскадёрга Lexus LC’нинг имкониятларидан тўлиқ фойдаланишга тўсқинлик қилмаган.
Аввалроқ Mercedes-Benz компанияси EQC 4x4² электройўлтанламаси прототипи нималарга қодир эканлиги тасвирланган навбатдаги ролик билан бўлишганди.
Изоҳ (0)