24 май куни соат 22:00 ларда Чилонзор туманида жойлашган «Эркин» ЙПХ масканида тўхтатиб текширилган Cobalt автомобилидан гиёҳвандлик моддаси топилди. Бу ҳақда Тергов департаменти хабар берди.
Маълум қилинишича, ЙПХ масканида хизмат олиб бораётган ИИБ ходимлари Самарқанд—Тошкент йўналиши бўйича ҳаракатланиб келаётган 43 ёшли К.У. бошқарувидаги Cobalt русумли автомобилни тўхтатиб, текширувдан ўтказган.
Машинанинг юкхона қисмидан Тожикистон фуқароси бўлган Х.А. исмли йўловчининг чамадони холислар иштирокида кўздан кечирилганида, унинг ичидан полиэтилен пакет бўлагига ўралган ва икки дона елим идишларга жойланган ўткир ҳидли моддалар борлиги аниқланиб, ашёвий далил тариқасида расмийлаштириб олинган.
Суд кимёвий экспертиза хулосасида Х.А.дан олинган соф оғирлиги жами 8,79 граммга тенг гашиш гиёҳвандлик моддаси эканлиги кўрсатилган.
Мазкур ҳолат юзасидан Чилонзор тумани бўйича ИИО ФМБ ҳузуридаги Тергов бўлинмаси томонидан Жиноят кодексининг 273-моддаси 5-қисми (гиёҳвандлик воситалари, уларнинг аналоглари ёки психотроп моддаларни кўп миқдорда қонунга хилоф равишда сотиш) билан жиноят иши қўзғатилиб, Х.А.га нисбатан қамоққа олиш тарзидаги эҳтиёт чораси қўлланилган.
Ҳозирда тергов давом этмоқда.
Аввалроқ Чилонзорда гўшт ичига гиёҳванд модда жойлаштириб олиб кетаётган шахс ушлангани, Тошкентда кучли таъсир қилувчи дори воситалари савдоси билан шуғулланган жиноий гуруҳ қўлга олингани, Жиззахда божхоначилар томонидан тўхтатилган Epica’дан гашиш, Самарқандда автомобиль шинаси ичидан опий топилгани ҳамда Наманганда умумий қиймати 2 млрд сўмлик дори воситаларини мамлакат ҳудудига олиб кирган шахслар ушлангани ҳақида хабар берилганди.
Изоҳ (0)