25 май куни Жиззах вилоятининг Янгиобод туманини Тожикистон билан чегарадош Ҳавотоғ қишлоғи ҳудудидаги очиқ майдонда ёнғин содир бўлди. Бу ҳақда вилояти ФВБ ахборот хизмати хабар берди.
Маълумотларга кўра, шу куни соат 12:05 да вилоят Фавқулодда вазиятлар бошқармасига ёнғин юзага келгани тўғрисида хабар келиб тушган.
Ёнғинни бартараф этишда 3 та ёнғин-қутқарув бўлинмаси, 32 нафар ҳарбий хизматчи ҳамда кўнгилли фуқаролар қатнашган. Биринчи бўлинма чақирилган манзилга соат 12:40 да етиб борган (энг яқин ёнғин-қутқарув қисмигача масофа 30 километр).
Кўрилган тезкор ҳаракатлар натижасида ёнғин соат 12:58 да ўраб олинган ва 15:00 да тўлиқ бартараф этилган. Тан жароҳати олган ва ҳалок бўлганлар йўқ. Ёнғин оқибатида 15 гектар очиқ майдонда қуруқ ўт, шох-шабба ва дарахтлар ёнган. Ёнғиннинг тахминий сабаби – очиқ оловдан фойдаланишда эҳтиётсизлик.
Ҳозирда кўрилган моддий зарар миқдори аниқланмоқда.
Аввалроқ Андижондаги «Ўзбегим» савдо мажмуасида ёнғин юз бергани, Ургутдаги деҳқон бозорида ёнғин чиққани ҳамда Сергелидаги бешта ҳовлининг ёниб кетишига сув етишмовчилиги ва йўллардаги тирбандлик сабаб қилиб кўрсатилгани ҳақида хабар берилганди.
Изоҳ (0)