АҚШ разведкаси COVID-19 келиб чиқиши тўғрисидаги ҳали тадқиқ қилинмаган маълумотларга эга, у бу ҳақда Оқ уйни хабардор қилган. The New York Times (NYT) АҚШ маъмуриятининг исми ошкор қилинмаган юқори лавозимли вакилларига таяниб, шундай хабар берди.
Газетанинг ёзишича, разведка ходимлари ушбу маълумотларни ўрганиш учун «улкан» компьютер қувватидан фойдаланмоқчи. Гап COVID-19 излари топилган Хитойнинг Ухань шаҳридаги лаборатория ишчиларининг ҳаракатланишлари ва коронавирус эпидемиясининг бошланиш хусусиятини ўрганиш ҳақида кетмоқда.
АҚШ маъмурияти вакили таъкидлашича, коронавирус келиб чиқиши бўйича текширув ҳали охири берк кўчага кирмаган.
Газетанинг ёзишича, Оқ уй, шунингдек, АҚШ иттифоқчиларининг лаборатория ва унинг фаолияти тўғрисида кўпроқ маълумот олиш учун ўз разведка тармоқларини улашини кутмоқда.
«Янги текширув илгари бевосита разведка фаолиятида қатнашмаган миллий лабораториялар ва федерал ҳукуматнинг бошқа илмий манбаларига ҳам мурожаат қилади», — деди маъмурият вакили.
NYT қайд этишича, АҚШ президенти Жо Байден 26 май куни ёзма баёнот бериб, АҚШ разведкаси COVID-19 тарқалиши қандай бошланган, вирус одамларга касалланган ҳайвон билан алоқада бўлиш орқали юққанми ёки Хитой лабораторияларидан сизиб чиққанми, деган саволларга жавоб бериш учун етарли маълумотга эга эмаслигини айтиб ўтди.
Шу муносабат билан давлат раҳбари 90 кун ичида барча мавжуд маълумотларни ўрганиш ва ушбу мавзу бўйича янги ҳисобот тайёрлаш учун махсус хизматларга «кучларини икки баравар оширишни» буюрди.
Ўз навбатида, 19 май куни АҚШ Вакиллар палатаси Разведка қўмитасидаги республикачилар коронавирус лабораторияда пайдо бўлгани тўғрисида ишончли далиллар мавжудлигини эълон қилди. Уларнинг фикрига кўра, COVID-19 эпидемияси Ухань вирусология институтидан сизиб чиқиши туфайли тарқалган бўлиши мумкин.
Ушбу баёнот ортидан АҚШдаги Хитой элчихонаси Вашингтоннинг коронавирус «лабораториядан тарқалгани» тўғрисидаги айбловларини танқид қилди.
«Яқинда айрим кишилар коронавирус келиб чиқиши тўғрисида диққатни ўзларига қаратиш учун эски сиёсий ҳийла-найранг қўллашга ҳаракат қилди. Туҳмат ва айбни бировга ағдариш билан коронавируснинг лабораториядан сизиб чиққани ҳақидаги фитна назарияси қайта жонланмоқда», — дейилади дипломатик ваколатхона хабарида.
Хитой дипломатларининг таъкидлашича, баъзи сиёсий кучлар пандемия бошланганидан бери бошқаларни манипуляция қилишга ва айблашга уриниб келади, шу билан бирга, ўз халқининг коронавирусга қарши кураш ва халқаро ҳамкорликдаги эҳтиёжларини инобатга олмайди.
Эслатиб ўтамиз, январь—февраль ойларида халқаро экспертлар миссияси Хитойнинг Ухань шаҳрида COVID-19 патогенининг келиб чиқишини ўрганиб чиқди. Ушбу сафар натижалари тўғрисидаги ҳисобот ЖССТ томонидан 30 март куни эълон қилинди. Ҳисоботда инфекциянинг келиб чиқиши тўғрисида тўртта эҳтимолий версия баён қилинган.
Изоҳ (0)