Арманистон Қуролли кучларининг разведка-диверсия гуруҳи Арманистон—Озарбайжон чегарасини кесиб ўтишга уринган олти нафар арманистонлик ҳарбийни асирга олди. Бу ҳақда Озарбайжон Мудофаа вазирлиги маълумотига таяниб, «РБК» хабар берди.

Фото: «ТАСС»

«27 май куни, тахминан, соат 03:00 да, Арманистон Қуролли кучларининг разведка-диверсия гуруҳи Арманистон—Озарбайжон давлат чегарасини Келбажар тумани Юхари Айрим аҳоли пунктига қараб кесиб ўтишга уринди», — дейилади хабарда.

Вазирлик, шунингдек, қўлга олинган Арманистон ҳарбийлари Озарбайжон армияси позицияларига олиб борувчи таъминот йўлларини миналашга уринганини таъкидлади. Бундан ташқари, чегарада Арманистоннинг ҳарбий техникаси, хусусан, танклари тўплангани айтилмоқда.

Ноябрь ойида имзоланган уч томонлама шартномага биноан Келбажар вилояти Озарбайжонга берилган эди. Республика 25 ноябрь куни расман минтақа устидан назорат ўрнатган.

Озарбайжон Ташқи ишлар вазирлиги ушбу воқеани изоҳлар экан, Арманистон бир мунча вақтдан бери чегараолди минтақалардаги тангликни атай кучайтириш сиёсатини олиб бораётганини айтди. «Арманистон Қуролли кучлари разведка гуруҳининг Озарбайжон ҳудудига кириб бориши, бу ҳудудни миналаштириш ва диверсияга уринишлари террорчилик ҳисобланади», — дейилади вазирлик баёнотида.

Арманистон Мудофаа вазирлиги олти нафар ҳарбий хизматчи қўлга олинганини тасдиқлади, аммо вазирлик воқеа Арманистон ҳудудидаги Гегаркуник вилояти чегара зонасида муҳандислик ишлари олиб борилаётган пайтда юз берганини билдирди.

«27 май куни эрта тонгда Арманистон Қуролли кучларининг олти нафар ҳарбий хизматчиси республиканинг Гегаркуник вилояти чегара зонасида муҳандислик ишларини олиб бораётган пайт Озарбайжон Қуролли кучлари уларни қуршовга олиб, асирга олган. Асирдаги ҳарбий хизматчиларни қайтариш учун зарур чоралар кўрилмоқда», — дейилади вазирлик хабарида.

Арманистон Ташқи ишлар вазирлиги ўз навбатида Озарбайжоннинг ҳаракатларини провокацион деб атаб, улар вазиятни янада кескинлаштиришга қаратилганини айтди. Вазирлик «бу минтақавий тинчлик ва барқарорликка жиддий путур етказиши мумкин» деб огоҳлантирди.

Арманистон бош вазири вазифасини бажарувчи Никол Пашиняннинг изоҳ беришича, ҳибсга олинган олти нафар ҳарбий хизматчи Озарбайжон билан чегарани тартибга солиш ва огоҳлантириш белгиларини ўрнатган ҳолда миналаштириш ишларини олиб бораётган эди.

Пашинян бу ишда бузғунчилик мақсади бўлмаганини таъкидлади. Шунингдек, у Арманистон ҳарбийларининг қўлга олинишини ўғрилик деб атади. «Бундай ҳодисалар юз бериб туради, чунки айримлар бизни ўз ҳудудимизда Озарбайжон ҳарбийлари борлигига кўникишимизни истайди, аммо бундай бўлмайди».

Унинг таъкидлашича, Озарбайжон ҳарбийлари зудлик билан Арманистон ҳудудини тарк этиши керак.