Халқ депутатлари Андижон шаҳар кенгашининг 17 май куни ўтказилган навбатдаги сессиясида депутат Шуҳрат Каримов дахлсизлик ҳуқуқидан маҳрум қилинганди. Андижон вилояти депутатлари ушбу иш юзасидан ўз эътирозларини билдириб, Президентга мурожаат қилди. Сенат депутатларнинг ушбу мурожаатига муносабат билдирди.
Сенат мазкур ҳолат Маҳаллий ҳокимият вакиллик органлари фаолиятига кўмаклашувчи комиссия (махсус комиссия) томонидан назоратга олиниб, ўрганиш ишлари олиб борилаётганини эслатиб ўтган.
«Таъкидлаш жоизки, ижтимоий тармоқларда эълон қилинган ҳар бир масалани пухта ва синчковлик билан қонунчиликка таянган ҳолда ўрганиш талаб этилади. Шу боис масалага ҳуқуқий ечим топиш ва адолатли қарор чиқариш мақсадида айни пайтда махсус комиссия томонидан ўрганиш ишлари давом эттирилмоқда. Тез кунларда ушбу ўрганиш натижалари юзасидан жамоатчиликка батафсил маълумот берилади», — дейилади Сенат муносабатида.
Шунингдек, мурожаатда келтириб ўтилган важлар ўз тасдиғини топган тақдирда, қонунчиликка зид равишда қабул қилинган қарор Сенат томонидан ўрнатилган тартибда бекор қилиниши таъминланиши таъкидланган.
Эслатиб ўтамиз, прокурор тақдимномасига кўра дахлсизлигидан маҳрум бўлган депутат Шуҳрат Каримов Андижонда ер сотувчиларнинг кирдикорларини фош қилиб юрган. Коррупцияга қарши курашиш агентлиги прокурорнинг бундай ҳаракатини «оқлаб бўлмаслиги»ни маълум қилиб, прокурор коррупция ҳолати ҳақида хабар берган шахсни ҳимоя қилиши кераклигини таъкидлаганди.
Кейинчалик депутат ҳокимлик ва прокуратура босим ўтказаётганини, Андижон шаҳар ҳокими эса сессиядаги ҳолат депутатнинг обрўсини сақлаш мақсадида қилинганини билдирди. Бош прокуратура эса дахлсизлик ҳуқуқи бекор қилинган андижонлик депутат нимада айбланаётганини маълум қилди.
Изоҳ (0)