Таниқли опера хонандаси Милена Мадмусаева «Ўзим» лойиҳасига берган интервьюсида 10 ой азоблар ичида яшагани ҳамда турмуш ўртоғи билан ажрашиши тафсилотлари ҳақида сўзлаб берди.
«Янги келин бўлиб тушганимда қайнонам ота-онангизни унутасиз, деб айтганлар. Телефонларимни олиб қўйишган. Ҳафтада бир марта, жума куни турмуш ўртоғимнинг олдиларида 2 дақиқа ота-онам билан гаплашиш ҳуқуқи берилган эди. Ҳалигача ҳайрон қоламан, нима сабабдан қайнонам менга шу гапларни айтган. Бир куни ота-онамни соғиниб йиғлаб ўтирсам, қайнонам келиб, бўлди, мен ҳам шунақа келин бўлганман. Келинлик шунақа. Ота-онангизни унутинг, улардан воз кечинг, деганлар. Мен қайнонамнинг кўзларига ҳеч қачон тик боқмаганман. Уларга онам ўргатганларидек яхши муомалада бўлардим, сочларини ювиб қўярдим. Тўй-ҳашамларга борар бўлсалар, тирноқларини маникюр қилиб, тақинчоқларимни бериб турардим. Юзларига ниқоблар қилиб қўярдим. Уларни онамдек яхши кўришга ҳаракат қилганман. Лекин мен улар учун бегона бўлганман. Ҳаттоки турмуш ўртоғим учун ҳам бегона бўлганман. Мен у ерда ўзимни худди бўрилар орасига тушиб қолгандек сезардим. 10 ой чидаганман, турмушим бузилмаслигига ҳаракат қилганман. Бир куни олти ойлик ҳомиладорман, соат кечаси 12:00, ота-онамни соғиниб йиғлаганман, турмуш ўртоғимга эртага онамга телефон қилиб беринг, деганман. Шунда улар сенга неча марта айтиш керак? Ота-онанг ҳақида умуман гапирма! Умуман, мен гапираётганимда тик туриб эшит, деб турғизиб қўйганлар. Шунда ҳаво етмай, мазам бўлмай, кўчага чиқиб кетганман. Уч соат кўчада юрганман. Қайтиб келиб, юзимни ювсам, юзимнинг бир томони қийшайиб қолган бўлган. Фарзандим учун қўрқиб кетганман. Эрталаб тонг отиши билан машинамга ўтириб, ойимларнинг уйига кетганман», — дейди Милена кўз ёшларини тия олмай.
Миленанинг айтишича, турмуш ўртоғи икки кундан сўнг ундан кечирим сўраб, уйига олиб кетади. Шу воқеадан кейин хонандага ота-онаси билан хоҳлаган вақтида телефон орқали суҳбатлашишига рухсат беришган.
«Фарзандим туғилганидан сўнг яна можаролар, тақиқлар бошланган. Онамларни гапирсам, жаҳллари чиқиб кетарди. На турмуш ўртоққа кераксан, на ота-онасига, на қайнука, қайнсингилга кераксан. Фақат қулликка кераксан», — дейди хонанда.
Милена мана шундай воқеа-ҳодисалардан сўнг ота-онасидан уни олиб кетишларини сўрайди. Ота-онасиникида бир ой яшаганидан сўнг у турмуш ўртоғига қўнғироқ қилади.
«Бу бизнинг ўртамиздаги муносабатимиз. Фарзандингиз сизнинг фарзандингиз. Хоҳлаган пайтингизда келиб кўришингиз мумкин, деб айтганман. Шунда турмуш ўртоғим у қиз ўша хонадонда катта бўлар экан, у менга бегона, деган эдилар. Мана, қизим 4 ёшга кирган, лекин турмуш ўртоғим бирор марта уни кўришга келмаган, қизим уни танимайди», — дейди Милена.
Маълумот учун, Милена Мадмусаева 1987 йилда туғилган. Ўзбекистон давлат консерваториясини тамомлаган хонанда Италия, Франция, Испания каби мамлакатларда ўтказилган нуфузли халқаро танловларда иштирок этиб, ғолибликни қўлга киритган. Милена Мадмусаева 2016 йилнинг 25 апрелида ўз продюсери Абдуҳамид Халиловга турмушга чиққан, жуфтлик 2017 йилнинг 1 апрелида қиз фарзандли бўлган эди.
Изоҳ (0)