2020—2021 йилги ўқув йилида Президент мактаблари илк «қалдирғоч»ларини катта ҳаётга кузатади. Президент, ижод ва ихтисослаштирилган мактабларни ривожлантириш агентлигининг маълумотига кўра битирувчилар сони 96 нафарни ташкил этади.
Хусусан, Тошкент шаҳридаги Президент мактабида таҳсил олаётган 24 нафар ўқувчи 11-синфни битиради. Улардан 21 нафари аллақачон хориждаги бир қатор университетларга грант асосида қабул қилинган.
Президент мактабининг илк «қалдирғочлари» келажакдаги мақсадлари ҳақида «Дарё»га сўзлаб берди.
Раҳматжон Гоипов, 17 ёшда
Болалигимдан кимё, математика, физика фанларига қизиқаман. Нефть ва газ кимёси Ўзбекистоннинг нафақат иқтисодиёти, балки саноатини ҳам ривожлантиради. Шу боис келажакда кимёвий муҳандислик йўналиши бўйича малакали мутахассис бўлишга қарор қилганман.
10-синфдан бери Президент мактабида таҳсил оляпман. Жума кечки пайт уйга кетиб, якшанба куни яна қайтиб келамиз. Мактаб менинг ривожланишимга катта ҳисса қўшган.
Ҳозирда 10 дан ортиқ университетларга ҳужжат топшириб, умумий ҳисобда 1 миллион доллардан кўпроқ миқдорда грант соҳиби бўлдим. Мен ҳам синфдошим Абдуллоҳ сингари бакалаврни Америкада Цинциннати университетида давом эттирмоқчиман.
Сабаби мазкур олийгоҳга ҳам грант ютганман. Университет мени стипендия ва турар жой билан таъминлайди. Ўқишим ва имтиҳонлардаги балларимни кўриб чиқиб, университет маъмурияти менга 85 минг доллар миқдорида маблағ ажратган. Бу пул ўқишимнинг ярмидан кўпроқ қисмини қоплаб беради. Бундан ташқари қобилиятли ўқувчилар учун яна турли дастурлар таклиф қилишади.
Америкага ҳужжат топшириш учун талабгорлар халқаро SAT ва IELTS сертификатларига эга бўлиши керак. Мен IELTS’дан 7.5 , SAT’дан эса 1330 олганман.
Шунингдек, мактабдаги баҳолар, имтиҳон натижалари ва ўқувчиларнинг ўзлари томонидан ёзилган иншолар ҳам муҳим ҳисобланади. Шунга қараб улар маълум бир миқдорда грант маблағларини таклиф қилади. Агар уларга натижаларингиз ёқса, яна қўшимча имкониятлар тақдим қилиши мумкин.
Ота-онам хорижда ўқиш қароримни маъқуллашган. Боиси Америка мен танлаган соҳа бўйича биринчи ўринда туради. Агар у ерда ўқисам кучли кадр бўлиб етишаман.
Август охирида Америкага кетамиз. Энг катта мақсадим, Америкада ўқиб, Ўзбекистонга қайтиш ва кимё соҳасида бурилиш ясаш.Шаҳризода Ризоқулова, 16 ёшда
Биоинженерия соҳасига қизиқаман. Бу соҳада технология ва биологияни бирлаштириб, фойдали дастурлар ҳамда одамлар учун зарур бўлган протез ва трансплантация органлари яратиш мумкин.
Шу пайтгача Америка элчихонаси томонидан ўтказилган турли лойиҳа ва дастурларда иштирок этганман. Президент мактабидаги қизлардан ташкил топган жамоамиз билан мобил дастур ишлаб чиққанмиз. Бу жинсий зўравонликдан ёки психологик муаммолари бор аёллар учун мўлжалланган эди. Мазкур лойиҳамиз билан Technovision chellange’да қатнашдик. Гарчи мобил дастуримиз танловда ғолиб бўлмаса-да, Ўзбекистондаги БМТнинг эътиборига тушдик.
Ҳозир «Имконият» номли янги мобил дастур яратдик. Дастурда эътиборимизни имконияти чекланган болаларни тарбиялаётган оналарга қаратдик. Бунда нафақат ота-оналар ва болалар балки, уларга ёрдам беришни истаган ташкилотлар ҳам рўйхатдан ўтиб, ёрдам бериши мумкин. Дастур яқинда Play Market’га қўйилди.
Дунёдаги энг катта мақсадим одамларга, оғир касалларга ёрдам бериш. Чунки трансплантация органлари ғояси билан кўпчиликнинг ҳаётини сақлаб қолиш мумкин.
Мен ҳам синфдошларим каби 9 та университетга грант ютганман. Улардан АҚШнинг Филадельфия шаҳрида жойлашган Темпл университетини танладим. Сабаби олийгоҳ менга биоинженерия соҳасида гигант бўлган компанияларда малака ошириш имконини беради. Бу грантим тўлиқ эмас. Университет бир қисмини қоплаб беради. Шунинг учун «Эл-юрт умиди» жамғармасига ҳужжат топширганман. Ҳозир жавобларни кутяпман.
Қизлар доимо ота-онаси томонидан қўллаб-қувватланса, янада катта натижаларга эришади. Болалигимдан ота-онам мени ўқишимга катта эътибор берган. Турли тўгаракларга, ўқув марказларига олиб борган. Ҳар бир муваффақиятимда эришаётган ютуқларимда ота-онамнинг хизмати жуда катта.
Аммо баъзида қизлар бирон нимага эришишни истаса, бутун жамият тўсқинлик қилиши мумкин. Шунинг учун қизлар руҳий томондан кучли бўлиши, ўз ҳаёти учун ўзи курашиши лозим. Ҳаётда ҳамма нарсага уриниб кўриш керак. Агар қўрқиб, ўзингизни синаб кўрмасангиз четда қолиб кетаверасиз.Абдуллоҳ Жўрахонов, 17 ёшда
Асли қашқадарёликман. Туғилганимдан сўнг орадан 2-3 йил ўтиб, Тошкентга кўчиб келганмиз. Дастлаб Чилонзор туманидаги 162-мактабда ўқиганман.
Болалигимдан хорижий тиллар ва математикага жуда қизиқаман. Президент мактабларида STEAM фанлари (табиий фанлар, технология, муҳандислик, санъат ва математика) асосида таълим берилишини эшитиб, ҳужжат топширганман. Чунки бу Ўзбекистондаги янги ўқитиш тизими эди.
Саралаш босқичларидан муваффақиятли ўтиб, 10-синфдан шу мактабда ўқишни бошлаганман.
Ўқувчилар жуда интилувчан. Дарсдан сўнг қўшимча машғулотлар бўлади. Ўзим кўп кузатаман, бўш хоналарга кириб олиб соатлаб дарс қиладиган ўқувчиларимиз бор. Шундай кучли болалар сафида бўлиш мени янада кўпроқ изланишимга сабаб бўляпти. Ҳатто аввал ёқтирмаган кимё, физика фанларига қизиқишни бошладим.
Кўплаб хорижий университетларга ҳужжатларимни топширганман. Ҳозирча 9 та университетга қабул қилинганим тўғрисида жавоб хатлари олдим. Баъзи бирларидан 50 фоизгача грантлар ютдим.
Бу йил 11-синфни тамомлайман. Ҳозирги энг катта мақсадим — дунё рейтингида 251-ўринда турадиган Американинг Цинциннати университетида таҳсил олиш ва дунёдаги энг кучли иқтисодчи бўлиш. Бироқ бу университетга грант ютмаганман. Мазкур университетда ўқиш ва яшаш харажатлари учун ўртача 45 минг доллар керак.
Онам уй бекаси, отам тадбиркор. Лекин ота-онамга оғирлигим тушишини хоҳламайман. Шунинг учун «Эл-юрт умиди» жамғармаси томонидан ўтказилган танловда қатнашдим. Яқинда суҳбатга кириб чиқдим. Икки ҳафталарда жавоби чиқади.
Насиб қилса грант ютиб, Америкада ўқиб, Ўзбекистонга қайтмоқчиман. Келажакда етук иқтисодчи бўлиб, учинчи Ренессансни амалга оширмоқчиман.Зулфия Усмонова, 16 ёшда
Мен тенгдошларим каби хорижий университетларга кирмаганман. Чунки дадам четда ўқишимга рози бўлмагани учун топширмаганман. Лекин маҳаллий университетларга топшириб, Инҳа ва Япония рақамли университетларига қабул қилиндим.
Бироқ келажакда магистратурани четда — Англия ёки Кореяда ўқиб келмоқчиман.
АҚШда ўқишни истамасдим. Сабаби у ерда бўлаётган воқеалар бизнинг менталитетимизга, динимизга мос келмайди, деб ҳисоблайман. Албатта, айланиб келишга арзийди, лекин 3 йил давомида у ерда яшашни истамасдим.
Мен ҳам синфдошим Шаҳризода билан бир жамоадаман. Ҳозирда турли мобил дастурлар ишлаб чиқяпмиз.
Энг катта мақсадим – халқ таълими вазири бўлиш. Вақти келиб, шу лавозимга келганимда Ўзбекистонда Президент мактабларини кўпайтирардим. Ўқитувчиларга ва ўқувчиларнинг билим олишга бўлган муносабатини ўзгартирмоқчиман. Чунки ҳозир кўп ўқувчиларнинг хаёлида биринчи ўринда ўқиш эмас, бошқа нарсалар бор.
Ўзим мисолимда айтадиган бўлсам, бу ерга келганимдан сўнг, ҳаётим тубдан ўзгарган. Синфдошларим ҳақиқатан ҳам ўқийди. Дарсларни вақтида бажаради, кеч қолмайди, яъни ҳар нарсага масъулият билан ёндашади.
Эски мактабимда эса ҳаммаси тескари эди. Аксарият ўқувчилар хоҳласа мактабга келарди, хоҳламаса йўқ. Ўқиш ҳам юзаки, билим учун эмас, баҳо учун ўқишарди.
Болаларнинг ҳаётида оиласининг таъсири жуда катта. Президент мактабига мен билан учта қиз ҳам кирган эди. Лекин уларнинг ота-онаси ётоқхонада қолиб ўқитиладиган мактабда таҳсил олишига рози бўлмади.
Тўғри, ўша ота-оналарни ҳам бир томондан тушунса бўлади, қизлар сони кам. Ҳар хил фикрларга бориш мумкин. Лекин мен қизларга ўзлари нимани хоҳласа, шу билан шуғулланишларини маслаҳат берардим.
Муаллиф: Хонзодабегим Аъзамова Фотомухбир: Мадина Нурман Муҳаррир: Дилшод Шарипов
Изоҳ (0)