Нимага бола боғчага бориши билан касал бўлишни бошлайди?

Бу савол ҳамма ота-оналарга яхши таниш. Ишлайдиган оналар бетоб бўлган фарзандига қараш учун «болничний» олишига тўғри келиши ҳам тез-тез учраб турадиган ҳолат. Бола боғчага борганидан кейин кетма-кет касал бўлишига бир қанча омиллар сабаб бўлади.

Бола контактда бўладиган кўп миқдордаги бактерия ва вируслар

Нафақат болалар, балки катталар ҳам иш жойини ўзгартирганида янги ҳамкасблар даврасида турли вирус ва бактерияларни юқтириб олиши мумкин. Барча бир-бирининг микрофлорасига ўрганмагунича касалланиш ҳолатлари қайталанаверади.

Иммун тизими билан боғлиқ муаммо

Катта одамлар янги ҳамкасблар олдига борганда 1-3 мартагача касалланса, ёш болаларда бу ҳолат ҳар 2-4 ҳафтада қайталаниши мумкин. Гап шундаки, катталарнинг иммун тизими болалардан фарқли равишда тўлиқ ривожланиб бўлган.

Турмуш тарзининг ўзгариши, янги танишув ва таомлар билан боғлиқ стресс

Боғчага боришни бошлаган болада ҳамма нарса: овқатланиш режими, яқинлари ва дўстлари билан мулоқот қиладиган вақт, ўйинчоқлар ҳамда одатлар ҳам буткул ўзгаради. Стрессга сабаб бўладиган бу каби ҳолатлар асаб тизимини қўшимча зўриқтиради.

Бола боғчага боришни бошлаганда инфекция билан зарарланиш ҳолати кўп кузатилмаслиги учун нима қилиш керак?

Бола ҳар гал боғчадан ёки кўчадан уйга келганида қўлларини совунлаб ювиш керак. Бунда чанг ва бир қанча микроорганизмлар ювилиб кетади. Болага аксирганда оғзини кафтлари билан эмас, тирсаклари билан ёпиш кераклигини ўргатинг. Бу аксирганда ажралган бактериялар атрофга тарқалишининг олдини олади.

Болага стресс кам бўлиши ва осон мослашиши учун тўлиқ боғчага беришдан аввал бироз муддатга олиб бориб туринг, дастлабки ҳафта давомида онаси ёнида бўлса, яна яхши. Боғчага чиқишдан аввал пневмокок, менингокок ва шу каби бошқа инфекцияларга қарши эмланиши ҳақида қайғуринг. Бу болани вирусли инфекция билан касалланишдан сақламаса ҳам, бактериал асоратларнинг олдини олади.

Болага ортиқча қўшимча дори воситалари: поливитаминлар, иммуномодулятор ва бошқалар бериш тавсия қилинмайди. Мазкур препаратлар боланинг жигари ва буйрагига зарар етказиб, аллергия келтириб чиқариши мумкин.