Агар инсон доимо чанқоқ ҳиссини туйса, нафақат парҳезга, балки турмуш тарзи ва ҳатто соғлиққа ҳам жиддий эътибор бериши лозим. Мунтазам чанқашнинг ҳам 7 та тиббий сабаби мавжуд.
Ортиқча туз
ЖССТ маълумотларига кўра, бугунги кунда туз ўртача эҳтиёждан икки баравар кўп истеъмол қилинмоқда. Албатта, бу яширин натрий, шунингдек, нотўғри овқатланиш туфайлидир. Туз том маънода ҳужайраларни сувсизлантиради ва натижада чанқоқ пайдо бўлади. Шуни ёдда тутиш керакки, чанқоқ сигнали пайдо бўлганида, тананинг аллақачон учдан бир қисми сувсизланган бўлади. Шунинг учун организмни бу каби ҳолатга келтирмаслик керак. Рационни қайта кўриб чиқиб, кунлик истеъмол қилинадиган туз миқдорини текшириш ва кун давомида сув ичишни унутмаслик тавсия этилади.
Интенсив машқлар
Агар инсон фаол ҳаёт тарзи билан шуғуллана бошласа, намликка бўлган эҳтиёжнинг ортиб бораётганини эсдан чиқармаслик керак. Борди-ю, суюқлик ичиш аввалгидай давом эттирилса, тана сувсизланиб қолиши мумкин. Жисмоний машқлар пайтида сув ичиш ва кунига ичадиган суюқлик миқдорини ошириш лозим.
Қуёшда туриш
Инсон фақат ёқимли қуёшли кунда юрган бўлса ҳам сувсизланишни бошдан кечириши мумкин. Бунга йўл қўймаслик учун ҳар доим сув олиб юриш ва вақти-вақти билан ичиши лозим. Гарчи чанқоқ пайдо бўлмаса ҳам бу суюқлик мувозанатини сақлашга ёрдам беради.
Қандли диабет
Инсон ҳожатхонага одатдагидан кўра тез-тез борадиган бўлса ва доимий равишда чанқаса, қондаги глюкоза миқдорини текшириб кўриши лозим. Бу диабетгача бўлган давр ёки диабет касаллигининг аломати бўлиши ҳам мумкин. Агар бемор аввалгидек кўп суюқлик ичса, парҳезни ўзгартирмаган бўлса ёки фаоллик даражасини оширмаган бўлса ҳам, чанқоқ ҳисси пайдо бўлаверса, албатта, эндокринологга мурожаат қилиш керак.
Ксеростомия
Ксеростомия ёки оғизнинг қуриши – оғизда сўлак безлари етарли миқдордаги суюқликни ажратишни тўхтатганда пайдо бўлади. Бу каби нохуш ҳолатдан халос бўлиш учун кўпроқ ичиш керак. Албатта, шифокор кўригидан ҳам ўтиш лозим.
Анемия
Доимий ташналикни келтириб чиқарадиган яна бир касаллик – бу анемия. Бундан ташқари, чанқоқ қанчалик кучли бўлса, касаллик шунчалик жиддийроқ бўлади.
Дорилар
Бир қатор дорилар суюқлик мувозанатига таъсир қилиши ва чанқашга олиб келиши мумкин. Масалан, диуретик ва антихолинергик дорилар таъсирида доимий чанқоқлик ҳисси кузатилади.
Изоҳ (0)