Жиззах вилоятининг Шароф Рашидов туманидан ўтган М-39 автомобиль йўлида Howo юк машинаси тормози ишламай қолгани сабаб бир нечта енгил автомобилларга урилиб, йўл-транспорт ҳодисасини содир этди. Бу ҳақда вилоят ИИБ ахборот хизмати хабар берди.
Маълум қилинишича, 17 май куни соат 22:45 ларда Тошкент—Термиз автомобиль йўли орқали ҳаракатланиб кетаётган бухоролик ҳайдовчи бошқарувидаги Howo юк машинасининг тормоз қисми ишламай қолган. Оқибатда юк автомобили олдинда ҳаракатланиб кетаётган 3 та Nexia ҳамда Lacetti машиналарининг орқа қисмига бориб урилган.
Енгил автомобиллар салонида бўлган Қашқадарё, Самарқанд ва Жиззах шаҳрида яшовчи 8 нафар фуқаро тан жароҳатлари билан Республика шошилинч тиббий ёрдам илмий маркази Жиззах филиалига ётқизилган.
Қайд этилишича, ҳудудда хизмат олиб бораётган вилоят ИИБ ЙҲХБ инспектори Howo юк машинасининг олдида огоҳлантириш сигнали билан ҳаракатланиб, бошқа автоуловларнинг йўл четига чиқиши тўғрисида огоҳлантириб борган. Бу эса ўз навбатида бошқа йўл-транспорт ҳодисаларининг олдини олиш ва инсонлар ҳаётини сақлаб қолишга хизмат қилган.
Аввалроқ Сирдарёда мактаб олдидаги пиёдалар йўлагидан ўтаётган 2-синф ўқувчиси юк машинаси уриб кетиши оқибатида вафот этгани, Самарқандда туркиялик ҳайдовчи бошқарувидаги Volvo юк машинаси пиёдани уриб юборгани тўғрисида хабар берилганди.
Изоҳ (0)