Sirdaryo viloyatining Sayxunobod tumanida piyodalar yo‘lagidan o‘tayotgan 2-sinf o‘quvchisi yuk mashinasi urib ketishi oqibatida vafot etdi. Bu haqda viloyat YHXB matbuot xizmati xabar berdi.
Hodisa 17-may kuni Sayxunobod tuman hududidan o‘tuvchi 4K-675 avtomobil yo‘lida sodir bo‘lgan. 26-maktabning 2-sinf o‘quvchilari yo‘lni piyodalar yo‘lagidan kesib o‘tayotganida ulardan birini “Gaz-53” yuk mashinasi urib yuborgan.
Bola shifoxonaga olib borilgan. Ammo olgan og‘ir tan jarohatlaridan shifoxonada vafot etgan.
Xabarda aytilishicha, hodisaga yuk mashinasi haydovchisining beparvoligi va piyodaning yo‘l qatnov qismiga keskin chiqib ketishi sabab bo‘lgan.
Avvalroq Samarqandda Cobalt maktab oldidagi piyodalar yo‘lagidan o‘tayotgan 8 yoshli qizni urib yuborgani, Qarshida yo‘lni kesib o‘tayotgan bolalar Lacetti ostida qolgani, Namanganda Damas urib yuborishi oqibatida 8 yoshli bola vafot etgani, shuningdek, yo‘ldan o‘tayotgan maktab o‘quvchilarini bosib ketishiga bir baxya qolgan Lacetti haydovchisi jarimaga tortilgani haqida xabar berilgan edi.
