Самарқанд вилояти Иштихон туманида банкоматдан пул ўмараётган шахс қўлга олинди, дея хабар бермоқда Миллий гвардия.
Қайд этилишича, 2021 йилнинг 15 май куни тунги 02:00 да Самарқанд вилоятида Миллий гвардия Қўриқлаш бошқармаси Иштихон тумани бўлими масъул ходимлари томонидан видеокузатув монитори орқали «Халқ банки» Иштихон филиалига қарашли банкомат олдида номаълум шахснинг қўлида темир жисм билан турганлиги аниқланган.
Воқеа жойига етиб борган туман Қўриқлаш хизмати тезкор гуруҳ ходимлари томонидан ушбу шахс банкомат эшигини бузишга ҳаракат қилаётган вақтида қўлга олинган.
Олиб борилган дастлабки суриштирув натижасида ушбу шахс Иштихон туманида яшовчи 1996 йилда туғилган фуқаро М.И. эканлиги маълум бўлган.
Ҳозирда ҳолат юзасидан туман ИИБ томонидан суриштирув ишлари давом этмоқда.
Бундан аввал Тошкентда банкоматларга жойлаштириш учун ажратилган 2,3 млрд сўмни ўзлаштирган банк ходимлари ушлангани, Андижонда банкоматлардан ноқонуний равишда 345,5 млн сўмни ўзлаштирган банк ходимига жиноят иши очилгани ҳамда Тошкентда тўйи учун 76 млн сўм қарз олган йигит банкоматларни ўмаргани ҳақида хабар берилганди.
Изоҳ (0)