Бухоро вилояти ҳокимининг хотин-қизлар масалалари бўйича маслаҳатчиси, вилоят маҳалла ва оилани қўллаб-қувватлаш бошқармаси бошлиғининг биринчи ўринбосари ўзгарди. Бу ҳақда «Дарё»га бошқарма ахборот хизмати маълум қилди.
Маълум бўлишича, ушбу лавозимда Ботир Зариповнинг маънавий-маърифий ишлар самарадорлигини ошириш, давлат тили тўғрисидаги қонун ҳужжатларига риоя этилишини таъминлаш масалалари бўйича маслаҳатчиси лавозимида фаолият юритган Феруза Ибрагимова иш бошлаган.
Феруза Ибрагимова 2015—2018 йилларда Олий Мажлис Қонунчилик палатасининг Аграр ва сув хўжалиги масалалари ҳамда фуқароларнинг соғлиғини сақлаш масалалари қўмиталари аъзоси сифатида, 2018—2020 йилларда вилоят ҳокими ўринбосари — вилоят хотин-қизлар қўмитаси раиси лавозимларида ишлаган.
Тайинловга қадар вилоят ҳокимининг хотин-қизлар масалалари бўйича маслаҳатчиси лавозимида бошқарманинг Когон шаҳар бўлими бошлиғи лавозимига ўтказилган Дилфуза Эргашева фаолият юритиб келган.
Феруза Ибрагимованинг аввалги ишини вилоят ҳокимининг жамоат ва диний ташкилотлар билан алоқалар бўйича ўринбосари котибияти мудири вазифасини бажариб келаётган Акбар Рустамов давом эттирмоқда.
«Дарё» мухбирининг қўшимча қилишича, айни кунда Ботир Зариповнинг маслаҳатчилари сони беш нафарга етган.
Изоҳ (0)