Андижонда ЙПХ ходимларининг хизматига тўсқинлик қилган фуқаролар судга берилиб, жазоланди

Андижон вилоятининг Марҳамат туманида ЙПХ ходимларининг хизматига тўсқинлик қилган фуқароларга нисбатан тегишли тартибда чора кўрилди, деб хабар бермоқда ЙҲХББ матбуот хизмати.

Маълум қилинишича, 11 май куни Марҳамат туманига жамоат тартибини сақлаш учун жалб этилган Андижон вилояти ИИБ ЙҲХБ ЙПХБ инспектори хизмат вазифасини бажараётган вақтида Mercedes ҳайдовчиси О.М. транспорт воситасининг давлат рақам белгисини кўринишини яширган ҳолда тўхташ тақиқланган жойда тўхтаган.

Шу сабабли инспектор ундан тегишли ҳужжатларини сўраган вақтида ҳайдовчи ходимга фаол қаршилик кўрсатиб, ҳужжатларни тақдим этмаган. Бир оз вақт оралиғида бир неча фуқаролар тўпланиб, ходимнинг хизматига тўсқинлик қилган. Инспектор ҳолат юзасидан туман ИИБ бошлиғи номига билдирги билан мурожаат қилган.

Мазкур ҳолат юзасидан туман ИИБ ходимлари томонидан терговга қадар текширув ҳаракатлари олиб борилиб, ҳужжатларнинг кўриб чиқилиши учун жиноят ишлари бўйича Марҳамат туман судига юборилган.

12 май куни ҳолат юзасидан суднинг очиқ мажлиси бўлиб ўтиб, фуқаро О.М.га БҲМнинг 3 баравари (735 минг сўм), К.М. ва Ш.А.га 1 баравари (245 минг сўм), М.Ж.га 2 баравари (490 минг сўмг) миқдорида жарима жазоси белгиланган ҳамда фуқаролар Ф.Х., А.Т., А.Ю.га нисбатан 5 сутка ва М.М. ҳамда Б.Н.га 3 сутка маъмурий қамоқ жазоси қўлланилган.

Аввалроқ Жиззахда ЙПХ ходимларидан қочиб кетган Cobalt ҳайдовчиси ва унга ёрдам берган икки таниши қўлга олингани ҳақида хабар берилган эди. Ҳолат юзасидан икки қоидабузарга 10 сутка маъмурий қамоқ жазоси тайинланган, яна бири БҲМнинг 5 баравари (1 миллион 225 минг сўм) миқдорида жаримага тортилган.