Бишкек Ўзбекистондан газ-мотор ёнилғисида ишлайдиган камида 350 та автобус сотиб олади. Қирғизистон пойтахти ҳокимлигининг маълум қилишича, Бишкек ва «Эко йўловчи ташиш» компанияси ўртасида ҳамкорлик меморандуми имзоланган.
Унга кўра, «Эко йўловчи ташиш» компанияси 2021 йил давомида Бишкекка Ўзбекистонда ишлаб чиқариладиган япон маркасидаги Isuzu автобусларини етказиб бериши керак. Газ-мотор ёнилғисида ишлайдиган автобусларнинг биринчи партияси 2021 йилнинг 1 июлига қадар етказилади.
Маълум қилинишича, Бишкек 2022—2023 йиллар давомида газ-мотор двигателида ҳаракатланадиган автобуслар сонини мингтага етказишни режалаштирмоқда. Булар орасидан имконияти чекланган йўловчиларга мослаштирилган 9, 10, 12 метрли автобуслар ҳам ўрин олади.
Маълумот учун, 1999 йилда ташкил топган SamAvto заводи метални бичишдан бошлаб, то тайёр маҳсулотни синашгача бўлган бутун циклга эга бўлган йирик маҳаллий корхоналардан бири ҳисобланади. Ишлаб чиқариш мажмуаси Германия, Италия ва Япониядан келтирилган дастгоҳлар билан жиҳозланган.
Изоҳ (0)