Telegram’даги «Мегаполис» канали Санкт-Петербург жанубидаги ташландиқ автотураргоҳ сурати билан бўлишди: очиқ осмон остида ўнлаб ноёб автомобиллар жойлашган бўлиб, улар орасида Lamborghini Diablo, Rolls-Royce, «ЗИЛ-41047», бир неча Америка маслкарлари ва тез ёрдам автомобилини учратиш мумкин, деб хабар беради Motor.
Машиналар шаҳар ташқарисидаги Софийская ва Седова кўчалари орасидаги бетон тўсиқ билан ўралган автотураргоҳда жойлашган. Пост муаллифи автомобилларнинг аксарияти ачинарли аҳволда эканлигига эътибор қаратган. «Ким шу қадар қимматбаҳо машиналарни бу каби ташландиқ жойда сақлаши мумкин?», деган саволни ўртага ташлайди у.
Фойдаланувчилардан бирининг тахминича, ушбу коллекция бундан олдин «Ленекспо» кўргазма комплексида намойиш этилган, яна бир фойдаланувчи машиналар ретро автомобиллар музейи ёпилганидан сўнг олиб келинган, деб ёзмоқда. Ташландиқ автотураргоҳдаги ноёб машиналар ҳақида батафсил маълумотлар йўқ.
Аввалроқ Нидерландияда ташландиқ Range Rover’лар «қабристони» топилгани, Варшава яқинида ўнлаб эски автомобиллар чириб бораётгани, Россияда ташландиқ «иномаркалар» қабристони аниқлангани тўғрисида хабар берилганди.
Изоҳ (0)