Навоий шаҳар перинатал марказида уч нафар эгизак қиз дунёга келди. Бу ҳақда Навоий вилояти ҳокимлиги матбуот хизмати хабар берди.

Фото: Навоий вилояти ҳокимлиги матбуот хизмати

Қайд этилишича, чақалоқларга Шукрона, Шодиёна, Имона деб исм қўйилди. Шифокорларнинг таъкидлашича, чақалоқлар соғлом, улар 2,5 килограмм, 2,4 килограмм, 2,4 килограмм вазнда дунёга келган.

Навоий шаҳар ФҲДЁ бўлими мудираси Азиза Файзиева чақалоқларга туғилганлик тўғрисидаги гувоҳномани сайёр тартибда топширди. Унинг маълум қилишича, 2021 йилнинг 5 май кунига қадар Навоий шаҳрида 1253 нафар бола дунёга келган.

Эслатиб ўтамиз, 2020 йил октябрида Бухоро вилояти Шофиркон туманида 3 эгизак туғилгани, уларга Мирзиё, Миромон ва Саида исмлари қўйилгани ҳақида хабар берилган эди.

2019 йилнинг март ойида ҳам ушбу туманда яшовчи бошқа бир оилада уч эгизак туғилган, уларга Президент Шавкат Мирзиёев шарафига Шавкат, Миромон ва Мирзиё исмлари берилганди. 2019 йилнинг октябрида Бухоро шаҳрида яшовчи яна бир оилада уч эгизак туғилганди. Чақалоқларга Шавкат, Мирзиё ва Саида исмлари қўйилганди. Ўша йилнинг сентябрь ойида Фарғонада туғилган уч эгизакка Бибихоним, Амирбек ва Темурбек деб исм қўйилган.

Шунингдек, 2019 йилда ЖиззахХоразмБухороҚашқадарё вилоятларида туғилган уч эгизакларга Шавкат, Миромон ва Мирзиё исмлари Фарғонада туғилган уч эгизакка эса Шавкатжон, Зироатхон ва Саидахон исмлари қўйилган.

Маълумот учун, Ўзбекистонда 2021 йилнинг февраль ойи ҳолати бўйича, 53 460 нафар чақалоқ туғилган. Уларнинг 1166 нафари эгизак экани қайд этилган.