2019 йилнинг 18 декабрида юз берган «Юнусобод фожиаси»да ҳалок бўлган олти ишчи орасида яккабоғлик Анвар Диёров ҳам бор эди. Республика махсус комиссиясининг 2020 йил 31 январь кунги далолатномасига асосан, ҳар бир жабрдийда сингари марҳум Анвар Диёровнинг ҳам хонадонига 261,9 миллион сўм бир марталик товон пули тўланган. Дастлаб 100 миллион сўм, 2020 йил сентябрида эса 161 миллион сўм пластик картага тушган.
Аммо марҳумнинг беваси Лобар Раҳмонова боқувчисини йўқотгани учун берилган товон пули тўлиқ эмас, деб ҳисоблаб, қайнатаси ва қайнакаси билан бирга турмуш ўртоғи ишлаган SBK Universal Construction Group қурилиш компаниясига нисбатан фуқаролик ишлари бўйича Мирзо Улуғбек туманлараро судига даъво аризаси киритган.
Судда Лобар Раҳмонова оиланинг фарзандлари учун тайинланган ҳар ойлик компенсация ва бир марталик нафақа умуман тўланмаганини қайд этган. Шунингдек, у марҳум умр йўлдошининг вафоти туфайли етказилган маънавий зарар учун тўлов ундиришни ҳам сўраган.
Суднинг 2020 йил 27 ноябрдаги ҳал қилув қарорига кўра, жавобгар SBK Universal Construction Group’дан даъвогар Лобар Раҳмонованинг уч нафар фарзандининг ҳар бирига 16 ёшга тўлгунга қадар ҳамда энг кичик фарзанди 3 ёшга тўлгунига қадар унинг ўзига ҳам, яъни Лобар Раҳмоновага ҳар ойда 727 минг сўмдан компенсация, 100 миллион сўм бир марталик компенсация ва етказилган маънавий зарар учун 300 миллион сўм компенсация ундириш белгиланган.
Даъвогар Лобар Раҳмонованинг адвокати Аслиддин Маҳаммадиевнинг «Дарё»да 2021 йил 8 апрель куни эълон қилинган «Тупроқ қазиб, тупроқлар остида қолган болам». Юнусобод метросидаги фожиа қурбонлари яқинларининг ўтган бир йилдаги ҳаёти ва компенсация муаммолари ҳақида» номли мақолада таъкидлашича, суд қарори 2020 йил 17 декабрда қонуний кучга кирган бўлса-да, жавобгар томон январда ҳам ижрони ихтиёрий равишда амалга оширмагач, мажбурий ундириш чораларини кўришга тўғри келган. Шу асосда компания банк ҳисоб рақамлари ва мол-мулкларига тақиқ қўйилган. Орадан бироз вақт ўтиб, марҳум Анвар Диёровнинг оила аъзоларига 100 миллион сўм пул ўтказилган.
Адвокатнинг айтишича, шундан кейин SBK Universal Construction Group негадир «даъво бўйича ҳал қилувчи қарорини олмадим», деган важ билан февраль ойида судга мурожаат қилган. «Ҳолбуки даъво муддати бўйича 20 кун ичида аппеляция бериши керак эди", — дейди адвокат Маҳаммадиев. Маълум бўлишича, жавобгар томон кассация тартибида шикоят беришга қонуний ҳақи қолмагани боис апелляция шикоятининг муддатини тиклаш ҳақида фуқаролик ишлари бўйича Мирзо Улуғбек туманлараро судига ариза берган.
«Дарё» мухбири Миролим Исажоновнинг хабар беришича, 5 май куни фуқаролик ишлари бўйича Тошкент шаҳар судида ушбу масалани апелляция тартибида кўриб чиқиш жараёни якунига етиб, суд қарор қабул қилди.
Судда марҳум Анвар Диёровнинг укаси Наврўз Эшонтўхтаров гувоҳ сифатида Жиноят ишлари бўйича Хива туман суди биносидан видеоконференцалоқа шаклида иштирок этди. У судьянинг саволларига жавоб бераркан, хусусан, шундай деди:«Дафн маросими куни кимдир 100 миллион сўм пул бериб кетди. Аммо биз шунча маблағ ким томонидан кимга берилганини аниқ билмаймиз. Чунки ўша куни акамнинг ҳамма яқинлари қаттиқ тушкунликда эдик, таъзияга келган одамлар билан овора бўлганмиз. Кейинроқ 100 миллион сўм давлат томонидан берилганини матбуот орқали билдик. Кейин бу пулни компания биз бердик, деди.
100 миллион сўмдан дафн маросимларига ишлатганмиз, ҳозир ундан қанча қисми қолганлигини аниқ билмайман. Бу пулдан янгамга ҳам берилган. Пул бўйича яқинлар орамизда ўзаро низо, тушунмовчиликлар йўқ. Ота-онамнинг мазкур суд жараёнидан хабари бор.
Биз компенсация ва нафақа пули ўз вақтида берилиши бўйича «Ўзбекистон темир йўллари», SBK Universal Construction Group компаниясига бир неча марта мурожаат қилганмиз. Аммо ҳаракатларимиз самара бермай, сарсон бўлганимиз учун охири адвокат ёллашга мажбур бўлдик», — деди марҳумнинг укаси.
Суд фуқаролик ишлари бўйича Мирзо Улуғбек туманлараро судининг 2020 йил 27 ноябрдаги ҳал қилув қароридаги жавобгар SBK Universal Construction Group’дан даъвогар Лобар Раҳмонованинг уч нафар фарзандининг ҳар бирига 16 ёшга тўлгунга қадар ҳамда энг кичик фарзанди уч ёшга тўлгунга қадар Лобар Раҳмонованинг ўзига ҳам ҳар ойда 727 минг сўмдан компенсация ва етказилган маънавий зарар учун 300 миллион сўм компенсация ундиришни ўз кучида қолдирди. 100 миллион сўм бир марталик компенсация ундириш тўғрисидаги қарорини бекор қилди.
Эслатиб ўтамиз, мазкур масалани апелляция тартибида кўриб чиқиш жараёни: биринчи суд мажлиси 2021 йил 30- апрель куни ўтказилган эди. Судда SBK Universal Construction Group компанияси адвокати даъвогар Лобар Раҳмонованинг уч нафар фарзандларининг ҳар бирига 16 ёшга тўлгунга қадар ҳар ойда 727 минг сўмдан бериладиган компенсацияси тўлаб борилишини, тўловнинг бу қисмига эътирози йўқлигини айтган эди. Бироқ у Мирзо Улуғбек туманлараро судининг жабрланувчининг яқинларига 100 миллион сўм бир марталик компенсация ва етказилган маънавий зарар учун 300 миллион сўм компенсация ундириш тўғрисидаги қарорини бекор қилишини сўраганди.
Даъвогар Лобар Раҳмонованинг адвокати эса қуйи суднинг қарорини ўз кучида қолдиришни сўраб, шундай фикр билдирганди.
«Жаноза маросимлари учун деб дастлаб 100 миллион сўм берилган. Аммо 100 миллион сўмни SBK Universal Construction Group компанияси берганлигини тасдиқловчи ҳеч қандай ҳужжат йўқ. Компания ҳисоб рақами ёки бухгалтериясидан ҳам пул чиқарилгани тўғрисида асословчи бирорта ҳужжат мавжуд эмас.
Анвар Диёровнинг яқинларига кимдир бериб кетган бунча маблағни компания «биз берганмиз», деб 2020- йилнинг август ойида марҳумнинг укасидан тилхат ёздириб олган. Орадан саккиз ой ўтиб, тилхат ёздириб олиниши шубҳали. Балки, 100 миллион сўмни «Ўзбекистон темир йўллари» АЖ, Вазирлар Маҳкамаси ёки ҳокимият вакиллари бергандир.
Ҳолбуки махсус комиссия қарори 2020 йил 31 январда чиққан ва бу қарорда аввал берилган 100 миллион сўм ҳисобга олинсин, дейилмаган. Тергов давомида ёки махсус комиссия ҳужжатларида ҳам SBK Universal Construction Group компанияси 100 миллион сўм берганлиги ҳақида гапирилмаган ва ёзилмаган», — деди адвокат.
Изоҳ (0)