Статистик маълумотларга қараганда, 30 ёшдан ўтган аёллар саломатлигига етарлича эътибор бермайди. Бунга аксарият хотин-қизларнинг карьера ва фарзанд тарбияси билан банд экани сабаб бўлади. Айнан шу сабаб ҳам мутахассислар шифокорга мурожаат қилиш ва кўрикдан ўтиб туришни тавсия қилади.
Асабийлашмасликка ҳаракат қилинг
Масъулият ва мажбуриятларнинг оғирлиги стресс келтириб чиқаради. Иш ва молиявий муаммолар, уй ишларига муккасидан кетиш ва бошқалар стресс гормони кортизолни фаол ажралишига олиб келади. Стресс иммун тизимига таъсир қилади, натижада организм инфекцияга таъсирчан бўлиб қолади. Бундан ташқари, юрак ва ошқозон-ичак тракти билан боғлиқ муаммолар ҳам келиб чиқиши мумкин. Стресснинг салбий оқибатларининг олдини олиш учун эса тўғри овқатланиш ва спорт билан шуғулланишни канда қилмаслик керак.
Жароҳатланишдан эҳтиёт бўлинг
Бу ёшда мушаклар 20 ёшдаги каби соғлом бўлмагани сабаб ҳам пай чўзилиши, оёқни қайириб олиш каби ҳолатлар кўп кузатилиши мумкин. Бундай вақтда ортиқча зўриқишдан қочиш ва кайфиятни кўтаришга ҳаракат қилиш керак.
Кўрикдан ўтишни унутманг
Бачадон бўйни саратони 35 ёшгача бўлган аёллар орасида энг кўп тарқалган касалликлардан бири ҳисобланади. Айнан шу сабаб ҳам гинеколог шифокор кўригидан ўтиш ва таҳлил топшириш керак. Мутахассислар исталган шубҳа ва касаллик симптомлари кузатилган вақтда шифохонага боришни кечга қолдирмасликни тавсия қилади. Масалан, тўсатдан қон кетиши эндометриоздан тортиб саратон сингари муаммолардан дарак бериши мумкин. Кўкрак саратони ҳам хавфли касалликлардан бири. Шу сабаб ҳам беэътибор бўлмаслик ва ўзгариш сезилганда зудлик билан шифокорга бориш керак.
Изоҳ (0)