Мьянмадаги тўнтариш натижасида ҳокимиятга келган ҳарбийлар мамлакат аҳолисига сунъий йўлдош антенналаридан фойдаланишни тақиқлади. Бу ҳақда Мьянманинг MRTV давлат телерадиокомпаниясига асосланиб Reuters хабар бермоқда.
Фото: FreeAds
«Сунъий йўлдош телевидениеси энди қонуний эмас. Телевизион ва видеотасвирлар тўғрисидаги қонунни бузган ҳар бир киши, айниқса, сунъий йўлдош антенналаридан фойдаланганлар бир йил муддатга озодликдан маҳрум қилиш ва 500 минг кьят (320 доллар) жарима билан жазоланади», — дейди MRTV.
Апрель ойида Мьянманинг мустақил газетаси The Irrawaddy ҳарбийлар Мьянма аҳолисидан сунъий йўлдош антенналарини тортиб олишни бошлагани ҳақида хабар берган эди. Бунга ҳарбийлар томонидан тақиқланган баъзи телеканалларнинг сунъий йўлдош антенналари орқали трансляцияни давом эттириши сабаб бўлган.
Мьянмадаги давлат тўнтаришидан кейин ҳарбийларга қарши намойишлар бошланди. Бунинг фонида янги ҳокимият аввал мамлакатда энг оммабоп ижтимоий тармоқ бўлган Facebook’ни тақиқлади, сўнгра мамлакатда интернет деярли бутунлай узиб қўйилди, барча тиллардаги Wikipedia блокланди.
Мьянмада тўнтаришдан бери 760 дан ортиқ одам ўлдирилган, уларнинг 50 дан ортиғи болалар. 4800 дан ортиқ одам, хусусан, 80 нафар журналист ҳибсга олинган. БМТ тўнтариш ва пандемия туфайли 54 миллион киши яшайдиган мазкур мамлакат аҳолисининг қарийб ярми 2022 йилда қашшоқлик чегарасидан тушиб кетиши мумкинлигини башорат қилди.
