Тошкент метросининг «Юнусобод» бекати қурилишида, 2019 йил 18 декабрь куни юз берган фожиа ортидан олти ишчи ҳалок бўлганди. Ҳодиса юзасидан ўша куниёқ жиноят иши қўзғатилган (иш очилган моддалар бўйича айбдорларга кўзда тутилган энг оғир жазо беш йилгача озодликдан маҳрум этиш эди). Бироқ орадан уч ой ўтиб, 2020 йилнинг 18 мартида Тошкент шаҳар прокуратураси «зарар тўлиқ қоплангани», «айбдорларга ижобий тавсифнома берилгани» ва «марҳумларнинг оила аъзоларидан эътирозлар йўқлиги» (ваҳоланки, бу вақтда компенсация пуллари ҳали тўлиқ берилмаган бўлган) учун айблилик масаласи ҳал қилинмасдан туриб, жиноий иш материалларини тугатиш тўғрисида қарор қабул қилган.
Бандлик ва меҳнат муносабатлари вазирининг 2020 йилнинг 24 январдаги буйруғига асосан ташкил этилган махсус комиссия 31 январь куни ҳар бир жабрдийданинг хонадонига 261,9 миллион сўмдан бир марталик товон пули тўлаш ҳақида далолатномани чиқарган.
«Юнусобод фожиаси»да ҳалок бўлган яккабоғлик Анвар Диёровнинг ҳам оиласига 100 миллион сўм берилган. Шундан кейин 2020 йил сентябрида яна 161 миллион сўм пластик картага тушган. Аммо боқувчисини йўқотган даъвогар: марҳумнинг беваси Лобар Раҳмонова боқувчисини йўқотгани учун берилган товон пули тўлиқ эмас, деб ҳисоблаб, қайнатаси ва қайнакаси билан бирга SBK Universal Construction Group компаниясига нисбатан фуқаролик ишлари бўйича Мирзо Улуғбек туманлараро судига даъво аризаси киритган.
Судда Лобар Раҳмонова оиланинг фарзандлари учун тайинланган ҳар ойлик компенсация ва бир марталик нафақа умуман тўланмаганини қайд этган. Шунингдек, у марҳум умр йўлдошининг вафоти туфайли етказилган маънавий зарар учун тўлов ундиришни ҳам сўраган.
Суднинг 2020 йил 17 ноябрдаги ҳал қилув қарорига кўра, жавобгар SBK Universal Construction Group’дан даъвогар Лобар Раҳмонованинг уч нафар фарзандининг ҳар бирига 16 ёшга тўлгунга қадар ҳар ойда 727 минг сўмдан компенсация, 100 миллион сўм бир марталик компенсация ва етказилган маънавий зарар учун 300 млн сўм компенсация ундириш белгиланган.
Даъвогар Лобар Раҳмонованинг адвокати Аслиддин Маҳаммадиевнинг «Дарё»да 2021 йил 8 апрель куни эълон қилинган «Тупроқ қазиб, тупроқлар остида қолган болам». Юнусобод метросидаги фожиа қурбонлари яқинларининг ўтган бир йилдаги ҳаёти ва компенсация муаммолари ҳақида» номли мақолада таъкидлашича, суд қарори 2020 йил 17 декабрда қонуний кучга кирган бўлса-да, жавобгар томон январда ҳам ижрони ихтиёрий равишда амалга оширмагач, мажбурий ундириш чораларини кўришга тўғри келган. Шу асосда компания банк ҳисоб рақамлари ва мол-мулкларига тақиқ қўйилган. Орадан бироз вақт ўтиб, марҳум Анвар Диёровнинг оила аъзоларига 100 миллион сўм пул ўтказилган.
Адвокатнинг айтишича, шундан кейин SBK Universal Construction Group негадир «даъво бўйича ҳал қилувчи қарорини олмадим», деган важ билан февраль ойида судга мурожаат қилган. «Ҳолбуки даъво муддати бўйича 20 кун ичида аппеляция бериши керак эди», — дейди адвокат Маҳаммадиев. Маълум бўлишича, жавобгар томон кассация тартибида шикоят беришга қонуний ҳақи қолмагани боис апелляция шикоятининг муддатини тиклаш ҳақида фуқаролик ишлари бўйича Мирзо Улуғбек туманлараро судига ариза берган.
Аслиддин Маҳаммадиевнинг қайд этишича, у компаниянинг ўша аризаси ҳақида эшитгач, уч марта судга борган, котибга, девонхонага учраган. Лекин суд қачон бўлиши ҳақида ҳеч ким маълумот бермаган.
«Суд иккинчи томонга хабар бермай, ишни бир томонлама кўриб, компаниянинг аризасини қаноатлантирган ва ижро муддатини тиклаб берган, аппеляция шикоятини шаҳар судига юбориш ҳақида ажрим чиқарган. Агар ижро муддати тиклаб берилмаганида эди, ҳозирда суд қарорининг ижроси тўхтамаган бўларди», — дейди адвокат. Соддароқ қилиб айтганда, агар шу ажрим бўлмаганида эди, Лобар Раҳмонова боқувчисини йўқотганлик ҳақидаги болалари учун бериладиган нафақаларни вақтида олаётган бўларди.
Шундан сўнг адвокат Аслиддин Маҳаммадиев Тошкент шаҳар судига даъво муддатини тиклаш ҳақидаги аризани бекор қилиш ҳақида хусусий шикоят берган. Аммо адвокатнинг бу аризаси қаноатлантирилмаган. Суд ижро муддатини тиклаб, ишни кўриш ҳақида қўшимча ажрим чиқарган.
SBK Universal Construction Group’нинг апелляция шикояти бўйича ўтказиладиган суд жараёни уч маротаба: 5 мартда «ҳали расмийлаштирилмаган» деб, 26 мартда «туман судига юборилган» деб, 20 апрелда «иш ҳужжатлари фуқаролик ишлари бўйича Тошкент шаҳар судига етиб келмаган» деб қолдирилган.
«Дарё» мухбири Миролим Исажоновнинг хабар беришича, 30 апрель, жума куни фуқаролик ишлари бўйича Тошкент шаҳар судида ушбу масалани апелляция тартибида кўриб чиқиш бошланди.
Очиқ ўтган суд мажлисида SBK Universal Construction Group компаниясининг адвокати журналистларнинг видео, фото ва овоз ёзиб олишларига розилик билдирмаган. Шу боис ОАВ вакилларига судда аудио ва видео ёзувларни олишга рухсат берилмагач, «Маҳалла», Zo‘r TV, «Менинг юртим» телеканали мухбирлари ва операторлари суд залини ўз хоҳиши билан тарк этган. «Daryo.uz», «Kun.uz», «Qalampir.uz», «Repost.uz» интернет-нашрларининг мухбирлари эса видео, фото ва овоз ёзиб олиш қурилмаларисиз суд жараёнида қатнашган.
Судда SBK Universal Construction Group адвокати даъвогар Лобар Раҳмонованинг уч нафар фарзандларининг ҳар бирига 16 ёшга тўлгунга қадар ҳар ойда 727 минг сўмдан бериладиган компенсацияси тўлаб борилишини, тўловнинг бу қисмига эътирози йўқлигини айтди. Бироқ компания адвокати Мирзо Улуғбек туманлараро судининг жабрланувчининг яқинларига 100 млн сўм бир марталик компенсация ва етказилган маънавий зарар учун 300 млн сўм компенсация ундириш тўғрисидаги қарорини бекор қилишини сўради.
Даъвогар Лобар Раҳмонованинг адвокати эса қуйи суднинг қарорини ўз кучида қолдиришни сўради ҳамда қуйидагича фикр билдирди.
“Жаноза маросимлари учун деб дастлаб 100 миллион сўм берилган. Аммо 100 миллион сўмни SBK Universal Construction Group компанияси берганлигини тасдиқловчи ҳеч қандай ҳужжат йўқ. Компания ҳисоб рақами ёки бухгалтериясидан ҳам пул чиқарилгани тўғрисида асословчи бирорта ҳужжат мавжуд эмас.
Анвар Диёровнинг яқинларига кимдир бериб кетган бунча маблағни компания “биз берганмиз”, деб 2020 йилнинг август ойида марҳумнинг укасидан тилхат ёздириб олган. Орадан саккиз ой ўтиб, тилхат ёздириб олиниши шубҳали. Балки 100 миллион сўмни “Ўзбекистон Темир йўллари” АЖ, Вазирлар Маҳкамаси ёки ҳокимият вакиллари бергандир.
Ҳолбуки махсус комиссия қарори 2020 йил 31 январда чиққан ва бу қарорда аввал берилган 100 миллион сўм ҳисобга олинсин, дейилмаган. Тергов давомида ёки махсус комиссия ҳужжатларида ҳам SBK Universal Construction Group компанияси 100 миллион сўм бергани хақида гапирилмаган ва ёзилмаган”, — деди адвокат.
Изоҳ (0)