Шавкат Мирзиёев шу ҳафта Коррупцияга қарши курашиш масалаларига бағишланган видеоселектор ўтказади

Президент матбуот котиби Шерзод Асадов 3 май, душанба куни бўлиб ўтган брифингда давлат раҳбари Шавкат Мирзиёевнинг шу ҳафтадаги иш режасидан видеоселектор йиғилиши ўтказиш ҳам ўрин олганини таъкидлади. Бу ҳақда «Дарё» мухбири хабар бермоқда.

Асадов шу ҳафтада давлат раҳбари иштирокида кутилаётган тадбирлар хусусида сўз юритди.

Унинг таъкидлашича, жорий ҳафтада Коррупцияга қарши курашиш масалалари бўйича видеоселектор ўтказилиши режалаштирилган.

«Унда давлат органлари, ҳокимларнинг ҳисоботлари эшитилади. Охирги вақтларда кузатилаётган воқеаларни, фош бўлаётган коррупцион ҳолатларни эшитяпсизлар. Бу ҳақда аввалги селекторларда ҳам айтилди. ‘Андиша қилиш даври тугади. Ҳамма бирдек – қонун устувор, жазо муқаррар’ »— деди Президент.

Бу масала доимий назоратда ва яқин орада алоҳида селектор ташкил этилаётгани коррупцияга қарши курашиш муросасиз тус олаётганини билдиради — деб таъкидлайди Президент матбуот котиби.

Шунингдек, чет тилларини ўқитиш тизимини такомиллаштириш, Токио Олимпиадасига ўзбекистонлик спортчиларни тайёрлаш масалалари бўйича йиғилишлар бўлиши кутилмоқда.

Бундан ташқари, қишлоқ хўжалиги техникаси корхоналарини трансформация қилиш бўйича тақдимот ўтказилиши ҳам мўлжалланган.