Жаҳон соғлиқни сақлаш ташкилоти (ЖССТ) Ҳиндистонда тобора ортиб бораётган коронавирусга чалиниш ҳолатларига қарши курашда ёрдам учун мамлакатга 2,6 мингдан ортиқ ходимини юборди. Бу ҳақда Associated Press’га таяниб, «Интерфакс» хабар берди.

Фото: AP Photo

ЖССТ раҳбари Тедрос Гебрейесуснинг айтишича, ходимлар ҳиндистонлик ҳамкасбларига техник маслаҳат, вакцинация ва мониторинг ишларида кўмаклашади. Унинг қўшимча қилишича, айни пайтда  Ҳиндистонда «юракни эзадигандан ҳам баттар вазият» ҳукм сурмоқда.

«ЖССТ Ҳиндистонни ускуналар ва материаллар, хусусан, минглаб кислород концентраторлари, кўчма дала шифохоналари ва лаборатория жиҳозлари билан таъминлаш учун қўлидан келганича ҳаракат қилмоқда», — деди Гебрейесус.

Коронавирус билан касалланиш кўпайгани сабабли Ҳиндистонда оғир эпидемиологик вазият мавжуд. Сўнгги бир неча кун ичида мамлакатда COVID-19 билан касалланганлар сони бўйича кетма-кет антирекордлар қайд этилмоқда. Бир кун олдин мамлакатда касалланиш бўйича 352 мингдан ортиқ янги ҳолат аниқланган.

Reuters ҳисоб-китобларига кўра, Нью-Деҳлида ҳар тўрт дақиқада бир киши коронавирусдан вафот этмоқда. Бутун мамлакат бўйича ҳар куни COVID-19’дан 2 мингга яқин ўлим қайд этилмоқда, аммо норасмий статистика бундан беш-ўн баравар кўп бўлиши мумкин. Meduza хабарига кўра, Деҳли ва бошқа шаҳарларда вафот этаётганлар шу қадар кўпки, уларнинг жасадларини кеча-ю кундуз кўчада ёқишга тўғри келмоқда. Кўча крематорияси ишчиларидан бири ушбу ҳолатни худди уруш кетаётганга ўхшайди, дея таърифлаган.

Ҳиндистон аҳолиси  уйида ҳам тиббий ниқобларини тақишга чақирилмоқда, айниқса, оилада коронавирус билан касалланган бемор бўлса.

Бош вазир Нарендра Модининг вакцина масалалари бўйича маслаҳатчи гуруҳи раҳбари доктор Винод Полнинг сўзларига кўра, агар бир оилада COVID-19 касаллиги аниқланган бўлса, оиланинг бошқа аъзолари уйда ниқоб тақиши зарур, чунки вирус уларга юқиши мумкин.

«Уйимизда ҳам ниқоб тақишни бошлаш вақти келди. Аввал ниқобни кўчада, жамоат жойида тақиш ҳақида гап борар эди, аммо инфекция тарқалиши кескинлашгани сабабли оила аъзоларимиз билан ўтирганимизда ҳам ниқоб тақсак мақсадга мувофиқ бўлади», —  деди Пол.

Ҳиндистон Соғлиқни сақлаш вазирлиги маълумотларига кўра, пандемия бошланганидан бери мамлакатда 17 миллионга яқин киши коронавирус билан касалланган. Ушбу кўрсаткич билан мамлакат касалланиш бўйича дунёда АҚШдан кейин иккинчи ўринда туради (32 миллион ҳолат), Жонс Ҳопкинс университети маълумотларига кўра, Ҳиндистонда жами 192 мингдан ортиқ одам COVID-19 қурбонига айланган.