Тошкентда 8 апрелдан бошлаб реклама конструкциялари оммавий бузиб ташланаётгани жамоатчилик ўртасида турли мазмундаги баҳс-мунозараларга сабаб бўлмоқда. 24 апрель куни мазкур мавзу доирасида Ўзбекистон Электрон оммавий ахборот воситлари миллий ассоциацияси томонидан ўтказилган очиқ мулоқотда ташқи реклама объектлари бўйича ўтказилган давра суҳбатида ҳар бир соҳа мутасаддилари ташқи реклама объектлари нега бузилаётганига жавоб берди. Бу ҳақда «Рост24» хабар берди.

Фото: Савелий Соколов

Ички ишлар вазирлиги Йўл ҳаракати хавфсизлиги бош бошқармаси ўринбосари Эрали Бозоров тартибсиз ўрнатилган реклама конструкциялари йўл ҳаракати хавфсизлигига салбий таъсир кўрсатиб, фуқароларимиз ҳаёти, соғлиғи ва мол-мулкига жиддий хавф солаётганини алоҳида таъкидлаб ўтди.

Давлат солиқ қўмитаси раиси ўринбосари Мирзиёд Маҳкамов айрим тадбиркорлик субъектлари томонидан ташқи реклама фаолиятида солиқ базаси яширилаётгани, солиқлар ўз вақтида тўланмаётгани, бу эса бюджетга тушумларнинг пасайишига сабаб бўлаётгани, натижада ижтимоий соҳа дастурларини амалга оширишда муаммолар пайдо бўлаётганини маълум қилди.

Қурилиш вазири бошқарма бошлиғи Б.Содиқов ўз чиқишида ташқи реклама конструкцияларини ўрнатишда шаҳарсозлик нормалари ва қоидаларига етарли даражада риоя этилмаётгани, шаҳарларнинг ташқи қиёфаси ва кўркига раҳна солинаётганини қайд этди.

Фавқулодда вазиятлар вазирлиги бошқарма бошлиғи Даврон Қамбаров ташқи реклама конструкциялари ноқулай об-ҳаво шароитлари, жумладан, кучли шамол ва ёғингарчиликлар таъсирида фуқароларнинг ҳаёти ва мол-мулкига хавф солаётгани, ушбу конструкциялар фавқулодда вазиятларда қутқарув ишларига тўсқинлик қилаётганига диққатини қаратди.

Истеъмолчилар ҳуқуқларини ҳимоя қилиш агентлиги директори Элмурот Ҳайтметов, жумладан, ташқи реклама констурксияларини тартибга келтириш учун тадбиркорлик субъектларига 6 ойдан кўпроқ муддат берилганини, бундан ташқари, медиация асосида ташқи реклама конструкцияларини тартибга келтириш учун судлар томонидан ҳам маълум муддат имконият тақдим этилгани, лекин шунга қарамай, бир қатор тадбиркорлик субъектлари томонидан бу борадаги қонун ижроси таъминланмаганига эътибор қаратди.

Республика манавият ва маърифат маркази раҳбари Минхожидин Ҳожиматовнинг таъкидлашича, айрим тадбиркорлар кўпроқ даромад олиш мақсадида ташқи реклама воситаларида миллатимиз тимсолига айланган Алишер Навоий, Заҳириддин Муҳаммад Бобур ва бошқа улуғ мутафаккирларимизнинг табаррук сиймоларидан бачкана усуллар орқали фойдаланишга уринмоқда. Халқимиз маънавияти ва қадриятларига очиқдан очиқ беписандлик ҳисобланган бундай ҳолатлар юртдошларимизнинг жиддий эътирозига сабаб бўлмоқда. Шу билан бирга, яна бир қатор ташкилотлар вакиллари ҳам мавзуга оид муаммоларнинг ечими юзасидан ўзларининг таклиф ва мулоҳазаларини билдирди.

Аввалроқ Монополияга қарши курашиш қўмитаси мазкур вазиятга муносабат билдириб, Вазирлар Маҳкамасининг «Ташқи реклама бозорини тартибга солиш тўғрисида» 2020 йил 20 февралдаги 104-сонли қарори билан ташқи реклама объектларини (конструкцияларини) қуриш, ўрнатиш, уларга ер ажратиш, тўловлар миқдорини аниқлаш, техник жиҳатдан тартибга солиш ва бошқа масалалар юзасидан ягона амал қилувчи механизмлар жорий қилинганини таъкидлаганди.

Эслатиб ўтамиз, Тошкентда ташқи реклама конструкцияларини хатловдан ўтказиш, ягона электрон реестрни шакллантириш мақсадида ташқи реклама объектларига мораторий жорий этилди. Ушбу тақиқ 2021 йилнинг 1 апрелидан 31 декабригача амал қилади.

Ижтимоий тармоқларда Тошкент шаҳрида юзлаб ташқи реклама конструкциярлари ҳеч қандай ҳуқуқий асослар кўрсатилмасдан бузиб ташланаётгани ҳақида хабарлар тарқалгач, Президент ҳузуридаги Тадбиркорлик субъектларининг ҳуқуқлари ва қонуний манфаатларини ҳимоя қилиш бўйича вакил ташқи реклама конструкциялари бузиб юборилишининг қонунийлигини ўрганишга киришди. Савдо-саноат палатаси реклама баннерлари нима сабабдан бузилаётганига ойдинлик киритиш мақсадида Тошкент ҳокимлигига сўров юборди.