Наманганда икки нафар ёлланма ишчи тупроқ остида қолиб, ҳалок бўлгани юзасидан жиноят иши қўзғатилди. Бу ҳақда «Дарё» мухбири Азизбек Абдувалиев хабар бермоқда.
2021 йил 24 апрель куни Наманган шаҳри, Навоий кўчасида жойлашган қурилиши тугалланмаган кўп қаватли уйларга канализация тармоғи тортиш учун траншея ковлаш ишлари олиб борилаётган пайтда тупроқ қатлами ўпирилиши оқибатида ер сатҳидан 4,5 метр чуқурликда ишлаётган икки нафар ёлланма ишчи тупроқ остида қолиб, ҳодиса жойида ҳалок бўлганди.
Вилоят прокуратураси матбуот хизматига кўра, олиб борилган терговга қадар текширув натижасида қурилиши тугалланмаган кўп қаватли турар жой объектлари қурилиши ва канализация тармоғи тортиш ишлари «Азизбек автогаз сервис» МЧЖ томонидан амалга оширилаётганлиги маълум бўлди. Жамиятга турар жой объектларини қуриш учун Наманган шаҳар ҳокими қарорига асосан рухсат берилганлиги, бироқ канализация тармоғи тортиш учун ер участкасида қазиш ишларини амалга оширишга шаҳар ҳокимининг тегишли рухсатномаси олинмаганлиги аниқланган.
Ҳозирда ҳалок бўлган шахсларнинг ўлими сабабларини аниқлаш юзасидан суд-тиббий экспертизаси тайинланган.
Наманган шаҳар Ички ишлар органлари фаолиятини мувофиқлаштириш бошқармаси ҳузуридаги тергов бўлими томонидан мазкур ҳолат юзасидан 2021 йил 24 апрель куни Жиноят кодексининг 257-моддаси (меҳнатни муҳофаза қилиш қилиш қоидаларини бузиш) 2-қисми «б» банди билан жиноят иши қўзғатилиб, дастлабки тергов ҳаракатлари олиб борилмоқда.
Изоҳ (0)