Rossiya Ichki ishlar vazirligi mehnat migrantlari uchun elektron patentlarni joriy etish rejalarini e’lon qildi

Rossiya mehnat muhojirlari uchun elektron patentni joriy qilishi mumkin. Bu haqda Rossiya Ichki ishlar vazirligining matbuot xizmatiga tayanib “RBK” xabar berdi. Patent elektron ma’lumot tashuvchi karta ko‘rinishida bo‘ladi.

Vazirlik vakilining so‘zlariga ko‘ra, IIV buning uchun kerakli me’yoriy asoslarni tayyorlamoqda. Mehnat muhojirlariga ishlash uchun elektron patent beriladigan birinchi shahar Moskva bo‘ladi.

“Ichki ishlar vazirligining yuqoridagi normativ-huquqiy hujjatlarini e’lon qilib, keyinchalik Ichki ishlar vazirligi va Moskva hukumati o‘rtasida tegishli shartnoma imzolanganidan keyin poytaxt hududida elektron patentni joriy qilish mumkin bo‘ladi”, — deb qo‘shimcha qildi matbuot xizmati.

Shuningdek, vazirlikning ta’kidlashicha, poytaxtda patent joriy qilish uchun xarajatlar federal budjet mablag‘lari hisobidan qoplanmaydi.

Fevral oyida hukumat Rossiyada uch oydan ko‘proq muddat vizasiz bo‘lish huquqiga ega bo‘lgan mamlakatlardan kelgan barcha migrantlar uchun biometrik va tibbiy nazoratdan o‘tish majburiyatini joriy etishni taklif qildi. Gap Rossiyaga ishlash uchun keladigan Yevrosiyo iqtisodiy ittifoqi davlatlarining fuqarolari haqida ketmoqda.

Migrantlarning sog‘lig‘i ustidan to‘liq nazorat qilinmagani sababli xavfli yuqumli kasalliklarni olib kirish xavfi ortadi, deb ta’kidladi qonun loyihasi mualliflari. Bundan tashqari, biometrik ma’lumotlar huquqni muhofaza qilish idoralariga jinoyatchilarni, terrorchilarni va Rossiyada bo‘lishi mumkin bo‘lmagan shaxslarni qidirishda yordam beradi, deb qo‘shimcha qildi ular. Ushbu qonun loyihasi ko‘rib chiqish uchun Davlat dumasiga yuborildi.

Shuningdek, IIV mehnat muhojirlari uchun elektron ro‘yxatdan o‘tish tizimi joriy qilinishini ma’lum qildi. Elektron ro‘yxatdan o‘tish ularning ishga joylashishi uchun asosiy shart bo‘ladi. Shu bilan birga, chet elliklarni ish bilan ta’minlovchilar ham maxsus reyestrda ro‘yxatdan o‘tishi kerak bo‘ladi.

Avvalroq Rossiya Ichki ishlar vazirligi MDH davlatlaridan kelib, Rossiyada noqonuniy ravishda yurgan muhojirlarni 15-iyunga qadar mamlakatni tark etishlarini talab qildi.

Ichki ishlar vazirligining statistik ma’lumotlariga ko‘ra, bugungi kunda Rossiyada 332 mingdan ziyod O‘zbekiston fuqarosi, 247 ming Tojikiston fuqarosi, 152 ming Ukraina fuqarosi, 120 ming Ozarbayjon fuqarosi, 115 ming Qirg‘iziston fuqarosi, 61 ming Armaniston fuqarosi, 56 ming Moldova fuqarosi, 49 ming Qozog‘iston fuqarosi noqonuniy migrant hisoblanadi.

Keyinroq Ichki ishlar vazirligi noqonuniy muhojirlarga mamlakatda vaqtincha bo‘lish muddatini uzaytirish uchun vazirlik organlariga murojaat qilishini qat’iy tavsiya qildi. Vazirlik murojaatida muhojirlarga cheklov choralari qo‘llanilmasligi ta’kidlandi.

Shuningdek, Rossiyada yirik loyihalarni amalga oshirish uchun mehnat muhojirlari yetishmayotgani, Moskvaga ishlash uchun borgan 500 dan ortiq o‘zbekistonlik 2 oydan buyon karantindaligi sabab norozilik bildirgani to‘g‘risida xabar berilgandi.