«Ўзбекистонда ўтган йилга нисбатан гўдаклар ва оналар ўлими ошган» — сенат қўмитаси раиси

Сенатнинг Суд-ҳуқуқ масалалари ва коррупцияга қарши курашиш қўмитаси раиси Наримон Умаров Ўзбекистонда ўтган йилга нисбатан гўдаклар ва оналар ўлими ошганини маълум қилган. Бу ҳақда Сенат матбуот хизмати хабар берди.

Қўмита раисининг маълум қилишича, Ўзбекистонда репродуктив саломатликни, оналик ва болаликни муҳофаза қилишга оид қонун ҳужжатлари ижросини таъминлашдаги камчиликлар оқибатида 2019 йилга нисбатан гўдаклар ўлими 428 тага (2019 йилда 6432 та, 2020 йилда эса 6860 та), оналар ўлими 10 тага (145—155) ошган.

Шунингдек, жиноятчилик ва ҳуқуқбузарликларни барвақт аниқлаш, уларни келтириб чиқараётган сабаб ва омилларни бартараф этиш бўйича камчиликларга барҳам берилмаган. Таъкидланишича, республика бўйича рўйхатга олинган жами 62 081 та жиноятнинг 41 087 таси ёки 66 фоизи олдини олиш мумкин бўлган жиноятлар тоифасига киради.

Умумий жиноятчилик 34,7 фоизга кўпайган, оғир ва ўта оғир жиноятлар 49 фоизга, жумладан, қасддан одам ўлдириш — 13, баданга оғир шикаст етказиш — 13, номусга тегиш — 27,7, босқинчилик 18,5 фоизга ортган.

Республика бўйича қидирувда бўлган 9790 нафар шахсдан 6761 нафари ёки 75 фоизи ушланмаган.

Мажлисда ушбу йўналишда назоратни янада кучайтириш, аниқланган ҳар бир қонун бузилиши ҳолатига нисбатан қатъий ва таъсирчан чоралар кўриш лозимлиги қайд этилган.