Самарқандда 40 ёшли эркак билан гаплашиб, бу ҳақда унинг оила аъзоларига айтмаслик учун 1500 доллар сўраган 16 ёшли қиз ушланди

Самарқанд шаҳрида 40 яшар эркак билан гаплашиб, ундан 1500 доллар талаб қилган 16 ёшли қиз қўлга олинди, дея хабар қилмоқда Тергов департаменти.

Маълум қилинишича, вилоят Ички ишлар бошқармасига 40 ёшли У.Т. исмли эркак ариза билан мурожаат қилган. Унда таниши 16 ёшли М.А. исмли қиз у билан гаплашиб юрганини оила аъзоларига билдириб, шарманда қилишини айтиб, 1500 АҚШ доллар талаб қилганини баён этган.

Олиб борилган тезкор тадбир давомида шу куни соат 21:30 да М.А. 1500 АҚШ долларни товламачилик йўли билан У.Т.дан олаётган вақтида ушланган. Шунингдек, М.А.дан махсус кимёвий ишлов берилган мазкур пуллар ашёвий далил тариқасида расмийлаштириб олинган.

Ҳолат юзасидан Самарқанд шаҳри бўйича ИИО ФМБ ҳузуридаги Тергов бўлими томонидан вояга етмаган М.А.га нисбатан Жиноят кодексининг 165-моддаси 1-қисми (товламачилик) билан жиноят иши қўзғатилиб, гумон қилинувчи тариқасида жалб қилинган. Ҳозирда тергов давом этмоқда.

Бундан аввал Тошкент вилоятида танишининг суратларини интернетда тарқатиш билан қўрқитиб, ундан 5 млн сўм талаб қилган нигериялик ушлангани, Самарқандда эркакнинг ўзга аёл билан ёзишмаларини хотинига кўрсатмаслик эвазига 14 млн сўм талаб қилган аёл қўлга олингани ҳамда Фарғонада фуқаро номига ариза ёзиб, уни қайтариб олиш эвазига 2 минг доллар талаб қилган икки аёл ушлангани ҳақида хабар берилганди.