Ўзбекистон Президенти Шавкат Мирзиёев 23 апрель куни мамлакатдаги дипломатик миссиясини якунлаётган Тожикистон фавқулодда ва мухтор элчиси Содиқ Имомийни қабул қилди.

Фото: Президент матбуот хизмати

Давлат раҳбари Ўзбекистон ва Тожикистон ўртасидаги дўстлик, яхши қўшничилик ва стратегик шериклик муносабатларида бугунги кунда икки биродар мамлакат етакчиларининг сиёсий иродаси ва қатъий ҳаракатлари туфайли юксак даражага эришилганини алоҳида таъкидлади.

Бугунги кунда икки томонлама ҳамкорлик барча йўналишларни қамраб олган ва жадал ривожланишда давом этмоқда, аниқ мазмун билан бойимоқда.

Яқин ойларда Тожикистонга олий даражадаги ташриф режалаштирилган бўлиб, бугун икки мамлакат ҳукуматлари узоқ муддатли истиқболга мўлжалланган кенг кўламли ҳамкорликнинг янги кун тартибини шакллантириш устида астойдил ишламоқда.

Фото: Президент матбуот хизмати

Давлат раҳбари икки томонлама муносабатларнинг бугунги юксак даражасига эришишдаги катта хизматлари ва кўп қиррали ҳамкорликни ривожлантиришга қўшган шахсий ҳиссаси учун элчи Содиқ Имомийни Ўзбекистон Фахрий ёрлиғи билан тақдирлади.

Дипломат унинг мамлакатдаги фаолияти юксак баҳолангани ва ҳар томонлама қўллаб-қувватлангани учун Ўзбекистон Президентига чуқур миннатдорлик билдирди.

Фото: Президент матбуот хизмати

Содиқ Имомий мамлакатлар ва ўзбек ва тожик халқлари ўртасидаги биродарлик муносабатларини мустаҳкамлаш йўлидаги мақсад ва вазифаларни сўзсиз амалга оширишга бундан буён ҳам бор куч-ғайратини қаратишини таъкидлади.

Бундан аввал Шавкат Мирзиёев қатор давлат элчилари ва ташкилот вакилларининг ишонч ёрлиқларини қабул қилгани ҳамда Абдулазиз Комилов Ўзбекистондаги миссиясини якунлаётган Тожикистон элчисини қабул қилгани ҳақида хабар берилганди.