UzAuto Motors ўзининг илк халқаро облигацияларини чиқаради

Молия вазирлиги ёрдамида UzAuto Motors АЖ илк бор 300 миллион доллар миқдорида халқаро облигацияларининг чиқарилиши ва халқаро инвесторлар билан телеконференциялар ўтказилиши ҳақида жаҳон молия бозори иштирокчиларига эълон қилди. Бу ҳақда Молия вазирлиги матбуот хизмати хабар берди.

Ташкиллаштирувчи банк-андеррайтерлар Citi (АҚШ), MUFG (Япония), Nataksis (Франция) ва Raiffeisen Bank International (Австрия) каби халқаро миқёсда етакчи банклардан иборат.

UzAuto Motors АЖ халқаро облигацияларни чиқариш мақсадида S&P ва Fitch халқаро рейтинг агентликларидан «Б+» («Барқарор» кутилма билан) баҳосига эга бўлган.

Шунингдек, 2021 йилнинг 22−27 апрель кунлари халқаро инвесторлар учун телеконференция (Global Investor Call) ўтказиш ва «яккама-якка» (оne-оn-оne) форматида телеконференциялар давом этиши режалаштирилган ҳамда мазкур тадбирларда бир қатор давлатлар халқаро инвесторларининг иштирок этиши кутилмоқда.

Халқаро инвесторлар қизиқишлари ва молия бозорларининг ҳолатидан келиб чиқиб, кейинги кунларда буюртмалар китоби очилиши ва халқаро облигацияларнинг фоиз ставкаси белгиланиши кутилмоқда.

Маълумот учун, 2018−2020 йилларда Молия вазирлиги, «Ўзсаноатқурилишбанк» АТБ, «Ўзмиллийбанк» АЖ ва «Ипотекабанк» АТИБ томонидан халқаро облигациялар чиқарилиб, 2,65 миллиард АҚШ доллари миқдорида маблағлар хорижий инвесторлардан жалб қилинган.

Мазкур транзакция Ўзбекистон корпоратив эмитентлари орасида чиқарилаётган биринчи халқаро облигация ҳисобланади.